英國人嗜賭，聖誕節有冇雪落都賭得一餐，四年一度兼自家主辦嘅奧運，肯定賭風熾熱；英國博彩公司珊瑚發言人預期，今屆奧運將收到約5千萬鎊（約6億港元）投注額，特別係英國大熱選手，好似女鐵人恩妮絲，奪金賠率只得1.72倍。不過英國人又唔係儍得晒，英國男足隊（圖）唔掂，家金牌賠率冷到11倍；不單冷過2.5倍大熱嘅巴西、3倍次熱嘅西班牙，同組嘅烏拉圭都以7倍熱過呢隊英軍。