越秀（123）以134億人仔賣廣州IFC項目俾越秀房託（405），呢單蛇吞象大刁，最着數嘅無可否認梗係越秀，幢大白象位於珠江新城區，要發展成熟本來就唔知守幾耐，仲食啱廣州經濟勢頭家掉頭向下，揀呢個時間以靚價套現真係高招，係難為越房股東啫。
越秀上星期又帶咗一班投資者上去睇場，盡最後努力唱好呢單交易。海迪問去完嘅朋友仔有咩感想，點知佢諗咗一陣，只係同海迪講，IFC裏面間FourSeasons酒店幾抵，2000蚊一晚，仲包600蚊F&B喎，去玩吓都有得諗嘅！至於越房有無得諗？唔好玩啦！
朋友仔提醒海迪，雖然IFC寫字樓招租一年，家話有60%出租率，但廣州原本寫字樓就供過於求，而未來幾年附近新落成的供應亦只會有增無減。同IFC遙遙相對嘅東塔，就係由周大福企業發展，家已經打好地基，聽講要高過IFC至少廿層㖭。
越秀股價近月喺高位相當硬淨，如果單刁最後通過，越秀負債即大減，反而可以諗諗。不過，上星期市場就曾經傳出越秀有抽水動靜，是否之後仍有手尾跟？要小心留意。
海迪