碧咸冇份踢倫奧，好多人都覺得好可惜。不過呢位萬人迷繼續以游擊方式參與奧運，周一就突襲奧運公園附近嘅商場，同「粉絲」合照，搞到一對母子開心到喊；今時今日碧咸仲咁有魅力，開幕禮點少得佢。
話說倫敦奧運公園附近嘅史達福特城（StratfordCity），有個商場搞緊宣傳奧運嘅活動，市民購物後就可以影張相，支持一下倫奧。一對母子「yeah晒」咁準備合照之際，碧咸就突然現身，並且提出合照。嗰位叫李維士嘅小朋友更加開心到喊，碧咸送上擁抱之後一齊合照，碧咸之後仲陸續同其他市民合照㖭。
雖然搞呢個活動嘅，係贊助碧咸好多年嘅「三間」，宣傳作用多於一切，不過碧咸肯放下身段宣傳奧運，都值得英國人敬佩。目前盛傳咸爺會喺開幕禮表演，佢家仲留喺倫敦，似乎傳聞真確性好高。相反，碧咸嫂維多利亞，就帶同二仔羅密歐去法國巴黎遊埠，似乎倫奧唔多關佢事咁。
奧雲拖鬥牛㹴傳聖火
講起碧咸，另一位英格蘭足球名將奧雲，周一喺東倫敦傳遞聖火，途經慈善寵物之家，呢個組織就好似香港愛護動物協會咁，專幫流浪貓狗搵新主人。
大會安排咗隻斯塔福鬥牛㹴陪奧雲仔傳聖火，點知隻鬥牛㹴經過一班同類時，竟然想撲埋去，奧雲爭啲拉都拉唔住；好彩仲揸得穩支聖火，如果唔係跌落地下，就笑死街坊。