球星踢國際賽搞到五癆七傷，踢唔到球隊大戰，真係時有所聞；今個月頭完成嘅歐國盃，就令到熱刺同阿仙奴好頭痕。事關兩隊中場柏加同路斯基，分別代表國家隊踢歐國盃時整傷，要做手術根治，英超8.18揭幕戰就唔使預佢哋。
曼聯領隊費Sir，之前俾人講每逢國際賽前夕，一眾國腳就無端端受傷，國際賽期後又可以復出；佢今屆奧運前仲講明，除咗傑斯外，唔畀其他球員以超齡身份出戰。其實家家有本難唸的經，國際賽搞傷晒麾下主力，真係幾令領隊頭痛。家柏加因傷缺陣，對熱刺嘅影響都幾大。
波亞斯排陣頭痛
31歲嘅柏加其實歐國盃前已經有傷，前領隊哈利列納都想佢退隊，不過佢忍痛參戰，英軍4場比賽都有上陣。點知，柏加上周返到球會，軍醫發現佢嘅阿基里斯跟腱舊患未除，所以安排佢幾日內進行小手術，不過都要休息6個星期；唔單止英超揭幕戰作客對紐卡素冇份，連英格蘭9月頭兩場世盃外，對摩爾多瓦同烏克蘭都冇得踢。
熱刺正喺美國集訓兼友賽，柏加缺陣，令新領隊波亞斯都幾頭痛。因為全能中場贊拿斯不滿冇得踢嗌走，好大機會回流諾定咸森林；辛度雲尼亞里又要幫巴西踢奧運，雖然奧運完結英超都未開「咧」，但恐怕到時已打到殘，惟有希望由史雲斯加盟嘅中場基菲爾施古臣助攻助守啦！
兵工廠季初冇3件
同樣喺歐國盃受傷嘅，仲有路斯基；呢位捷克隊長喺歐國盃分組賽已經整傷足踝，之後接受手術，已經無法出席阿仙奴亞洲之旅，初步估計亦要休息一個多月，揭幕戰對新特蘭又冇份。好彩，阿仙奴都仲有中場派牌人物，好似西班牙嘅阿迪達就已經好番，仲有隨隊到亞洲。另外，兵工廠季前缺陣嘅，仲有右後衞沙格拿同中場韋舒亞；韋舒亞嘅足踝傷手尾仲好長，預期10月先可以復出。