家手機廣告日日播，講碧咸射個香蕉波打響奧運，點知英國男足領隊皮亞斯唔選呢位萬人迷入隊，倫奧冇碧咸，始終好似爭咁啲嘢。英國傳媒報道，周五嘅開幕禮，碧咸將會有一個角色，但具體形式仲係秘密。
英國《每日電訊報》報道，組委會為咗平息碧咸全球粉絲嘅不滿，將安排佢喺開幕禮表演。雖然碧咸冇以運動員身份參加過奧運，肯定冇得燃點聖火；不過開幕禮過程中，都有唔少節目，如果好似由碧咸表演下腳法，或者由佢揸架富英國色彩嘅雙層巴士入場，相信觀眾都會好受落。
開幕禮發言人表示：「碧咸嘅角色係高度秘密，希望保持神秘感到最後一分鐘為止。」
而燃點聖火嘅大熱人選，一直係划艇選手列格夫同十項鐵人湯臣，不過近期女跑手荷姆絲呼聲越嚟越高；因為英國組委會希望由一位以往嘅成功運動員擔任外，仲希望佢有國際影響力。荷姆絲雅典奧運贏800米同1,500米金牌外，退休後負責青少年培訓工作，深受尊重，今次爆冷都唔出奇。
英單車名將賀爾任旗手
另外，英國決定由單車名將賀爾（SirChrisHoy）擔任開幕禮持旗手；36歲嘅賀爾08京奧閉幕禮亦都領英國隊進場，嗰屆佢更加獨取3金㖭；英國奧委會周一經過31支隊伍投票，決定再由賀爾擔當呢個重任。雖然開幕禮係國家盛事，英國代表團共有542名運動員，但就有約一半唔會出席，單係田徑隊就有70人缺席。
