教育局的國民教育交流團帶學生訪毛澤東故居和遺物，資料都是歌頌毛「救國救民」。時事評論員批評，如此唱紅手法已遭內地唾棄，「香港所謂國際城市，居然搞得咁愚民，真係好諷刺」。學者叮囑學生，學習歷史應多角度分析，勿信一面之詞。
時事評論員林和立指出，已被免職的中共前重慶市委書記薄熙來曾贊助學生上山下鄉，美其名向農民學習，實際搞個人崇拜，透過洗腦驅使學生效忠，「內地稍為有啲良知嘅知識分子都群起攻之。大陸中學生都知，毛澤東喺歷史上犯過好嚴重錯誤」。
香港教育局要香港學生透過崇拜毛澤東學習國情更是荒謬。毛發動大躍進、文革等是名副其實的人禍，就算在內地，都有反思。民主黨主席何俊仁也指出，鼓吹崇拜毛澤東在50年代一直風行至70年代，「好似四人幫鼓吹國粹派，將毛澤東視為神聖，當時真係有人信，家就好舊好老套，根本呃唔到人」。
應多角度探討中共建政
林和立說：「一般話毛澤東49年之前係偉人，49年後係罪人，已經簡化咗問題。毛澤東嘅過錯有迹可尋，佢好少睇馬克思主義嘅書，反而睇好多資治通鑑、講帝皇封建嘅書，所以佢搞農民革命嘅心態好封建，學生應該要知呢啲背景資料。」
嶺南大學香港與華南歷史研究部主任劉智鵬指出，探討毛澤東歷史要多角度，應由晚清開始探討共產黨發展史，分析中共建政歷程，另有專門研究毛澤東如何奪權，「行萬里路之前同之後，都要讀萬卷書。要從幾個角度睇歷史，唔好信一面之詞」。劉強調，舉辦歷史考察團應訂立學習目標及照顧持平角度，「片面去感受，絕對唔理想。最薄嘅毛澤東傳都幾百頁，關於佢嘅研究可以塞滿幾間屋，點可能睇吓紀念館、故居就可以了解？」《蘋果》記者