《台北安和路》
陳冠希（Edison）大前晚喺台灣出席MCHotDog（熱狗）嘅新碟派對，好努力咁爭取曝光機會。上台獻唱嘅時候，Edison唱得好賣力連青筋都現埋，而熱狗仲話要同佢組隊「瑪利兄弟」，要打敗飛輪海喎。去到台灣Edison就比喺香港親民，至少冇踩記者隻腳扮冇嘢，仲不停向在場嘅媒體示好，現場亦有唔少佢嘅女fans守候。派對後Edison坐車去安和路一間餐廳食消夜，約一個鐘後Edison離開，佢發現現場有記者，就即時跳上保母車，之後保母車駛走，仲同另一部「隨從車」喺台北街頭飛車返酒店，其間衝咗兩次紅燈，都幾危險。
Edison前日仲喺台灣為新碟錄音，對於衝紅燈一事，Edison經理人表示歉意話：「我記得是歌迷的車闖紅燈，但如果是我們的車，會請司機以後要注意，如果是歌迷闖紅燈，也會找機會提醒他們。」同時佢都好關心記者話：「記者也要小心，不要闖紅燈。」真係多謝晒。
撰文：葉雪
