阿仙奴殘陣嚟亞洲備戰新球季，求大俠收到唔少球迷投訴，大嗌退票同回水。邀請兵工廠訪港嘅傑志總領隊伍健可能見群情洶湧，前晚就同阿仙奴CEO加迪斯傾咗成半個鐘長途電話；加迪斯同佢講，會再同領隊雲格傾吓，希望安排缺席球星歸隊。
加迪斯承諾同雲格傾
過去好少嚟亞洲嘅兵工廠，連續兩年東來，不過，今年嘅陣容同上年就差得遠；既冇尹佩斯，連普多斯基同基奧特兩名新兵都唔見影，難怪買咗下星期日（29日）飛嘅球迷嬲到爆。伍生呢兩日亦好積極做嘢，前晚響Facebook講，已同阿仙奴聯絡，仲同CEO加迪斯勁呻對名單嘅不滿。
伍生之後都表示，唔多滿意阿仙奴嘅態度，仲話如果唔主動問，分分鐘連中場路斯基啱啱做完手術，要休息6個星期都唔知。伍生又話，加迪斯已經好清楚傑志嘅要求，亦承諾會再同雲格傾吓香港站名單問題，一有消息就會同球迷交代。
今晚友賽大馬選手隊
陣容暫時唔對辦嘅阿仙奴，今晚9點9就會響吉隆坡踢今次亞洲之旅嘅第1戰，對手係馬來西亞選手隊。領隊雲格前日出席記者會，被問到愛將尹佩斯去向時，就話好想留佢，但淨番1年合約，要以球會利益為依歸，仲話點都會響英超開鑼前決定。
當被問到中場新星韋舒亞幾時復出，雲格都有啲無奈，只係話韋舒亞做完手術，家康復緊，但做過兩次手術，所以唔會逼佢。另外，上季傷多過踢嘅戴亞比今晚就正選落場，雲格都話想睇吓佢仲得唔得。