奧運熱：備戰吉祥物　私伙賽前曲

生活有些時候特別需要音樂，上班族如你我，一大早依賴音樂抖擻精神，運動員靠音樂督促意志。據說籃球明星米高佐敦就有一首唔聽唔舒服的「賽前曲」《Sirius》，旋律一響，信心熱血鬥志瞬間召集。征戰前夕，香港奧運代表隊運動員跟大家分享私伙賽前曲及備戰吉祥物，這些可也是你的打氣歌？

記者：劉嘉蕙
攝影：黃子偉、劉嘉蕙

方綺蓓——我和我最後的倔強

今年香港田徑隊派出六人參加奧運，方綺蓓是唯一女將。採訪之時距離奧運還有一星期，方綺蓓幾位隊友早已出發歐洲參加其他賽事，體院偌大的田徑場上，獨剩她一個人努力練跑備戰奧戰，但小妮子不寂寞，因為為她打氣的是五月天的音樂。「練跑時要專心，不會聽歌，但有私人時間，我就會勁播五月天，最常聽的是《倔強》。」2004年作品，成首都咁熱血，當中幾句歌詞如：「我和我最後的倔強/握緊雙手絕對不放/下一站是不是天堂/就算失望不能絕望」，是不少年輕人的激勵自我金句。奧運入場券不容易拿到，機會可一不可再，方綺蓓近日也狂煲五月天另外兩首歌《有些事現在不做一輩子都不會做了》及《叫我第一名》，自言聽親都腎上腺素飆升，練跑時充滿力量。

私家枕頭套陪戰

比賽臨近，方綺蓓一方面加緊操練體能，另一方面密密跟隊友越洋聯繫，了解當地氣候狀況，「隊友話家歐洲天氣幾凍，所以特別執多咗幾件長袖衫；另外每次出國比賽，都會準備一支家鄉水，去到當地頭幾天飲用，避免水土不服。」私家枕頭套也是她行李箱的MustHaveItems之一，「出去比賽都會帶私家枕頭套，圖案冇特別，普通有隻熊仔咋，平時屋企用開。我習慣用屋企枕頭套，感覺安心舒服啲。」
陪她出發的還有電腦一台以及韓劇日劇，「我覺得煲劇最減壓，投入劇情可以分散注意力，我最近睇完韓劇《屋塔房王世子》，好冧！今次去倫敦，準備睇台劇《我可能不會愛你》，朋友話好睇！女運動員唔會圍埋一齊搽指甲，或者到時約埋煲劇啩！男隊友？唔理佢哋，佢哋通常打機！」講起煲劇，方綺蓓特別多嘢講，陽光笑容燦爛多幾錢。大概是難得有人撩講比賽以外無謂嘢，臨走時方綺蓓突然折返叮囑記者，「可唔可以幫我寫埋何韻詩？我好鍾意佢啲歌，要揀一首？嗯……好多隻喎（苦思十秒），《鋼鐵是怎樣煉成的》啦，好配合現況。」寫咗嘞女鐵人，請加油！

■五月天《倔強》

■何韻詩《鋼鐵是怎樣煉成的》

米高佐敦賽前唔聽唔舒服的歌曲《Sirius》，是TheAlanParsonsProject的82年作品。

黃永棋——休息是為了走更長的路

被香港傳媒稱為「林丹殺手」的港隊羽毛球奧運代表黃永棋，球場殺敵時狠勁十足，私下卻愛聽慢歌，這位擁有八級鋼琴資格的大男孩對音樂選擇有一套見解，「平時打波太激烈，所以鍾意聽慢歌舒緩一下，最鍾意五月天的《知足》。」《知足》是五月天少有的抒情慢歌。坐在球場邊的樓梯，黃永棋雙手撐地，施施然想出另外兩首愛歌，「周柏豪的《最好不過》，同埋嚴爵的《好的事情》，首歌有一句歌詞我好鍾意……」正當記者以為會聽到一兩句熱血對白，他把身子往後再傾了些，以闊佬懶理樣緩緩吐出一句歌詞，「就係第一句『休息是為了走更長的路」，我好想休息。』此刻令黃永棋諗起就開心的事，不是奧運贏林丹，而是八月去大阪，「奧運之後，終於可以放假，好耐冇放過長假。今次會同朋友去大阪，應該會買好多好多嘢、食嘢、浸溫泉（八月好熱喎！）係，照浸！」

賽前必噴香水

黃永棋坦言備戰奧運日子少了樂趣，「近排都住宿舍，每朝五點幾起身做早操、練六至九個鐘波，好耐無返屋企，都好耐無打過機。平時我最鍾意食街邊立雜嘢，好似大腸墨魚丸呀咁，近來都唔敢食，驚肚痛。最大娛樂得番睇戲，我乜戲都睇，一放假就去，一陣都會睇《蝙蝠俠》。」不同女運動員有一兩樣姿整嘢，才剛剛出發往倫敦的黃永棋說：「無乜特別嘢執」，「衫都唔係好使拎，有贊助。」不可不帶的，居然是玫瑰味香水！「阿媽叫，風水嘢，話比賽前噴一噴會好啲，我近兩個月開始噴，好似真係有啲用喎！」