【本報訊】打風季節來臨，斜坡安全受關注。粉嶺崇謙堂村一名老婦，因自揭私人土地有危險斜坡，自責累家人孭起百萬元「斜坡債」，最後鬱鬱而終，至今仍未履行修葺令。事件揭發屋宇署提供的樓宇安全貸款計劃上限一百萬元，且要3年內還清貸款，條件苛刻，貧困業主被迫活在危牆下。
涉事斜坡位於粉嶺崇謙堂村304號，佔地約六萬呎，由男戶主陳先生的太婆購入，現由陳先生夫婦、老父及一對在學兒子同住。陳太憶述「斜坡噩夢」始於2000年，「當時有一批後生仔問奶奶（陳老太）呢度有冇斜坡，話政府整唔使錢，奶奶就准佢哋去勘察」。屋宇署證實石屋後一幅約4米高的危險斜坡位處私人土地，業主須自費修葺。
還款條件苛刻
陳家聘專家估價，「維修要七、八十萬，加埋顧問費要成百萬」。家人無怪責陳老太自揭斜坡，但老人家自怨自艾，「奶奶以前食得瞓得行得，但事後怨自己累全家，老人病惡化，03年過身，死前仲掛住呢件事，係鬱鬱而終。」
05年6月，斜坡在暴雨中倒塌，陳先生花了整年時間清理泥石及自行鞏固斜坡，「用咗萬幾蚊買料」。斜坡因不是由專業人士施工而不獲認可，屋宇署繼續發出修葺令，去年陳家遭法庭判罰1,500元，「屋宇署終於肯估地價，話塊地值200萬，最多借100萬，三年內還清，每個月要還2.8萬以上，唔食都還唔起，唔怪得冇人借政府錢」。
目前維修費已飆升至130萬元，獲官方貸款也需另籌30萬元。陳太批評屋宇署未能急市民所急，建議當局應以土地抵押或延長還款期。屋宇署發言人表示，借款人因經濟困難可申請延長至最多72期；就崇謙堂村個案，暫未考慮強制回收土地。