各位球迷如果經常遊周列國，自然面對航班延誤，面對飛機delay，大家通常都係睇吓書打發時間；車路士貴為歐聯同英足盃雙料冠軍，飛機delay都與眾不同，就係齊齊落停機坪操練。
車仔上周四美國季前賽4:2大炒西雅圖海灣者，上周六就準備乘私人飛機由西雅圖到紐約，準備周一喺洋基球場對法甲新貴巴黎聖日耳門，點知航班延誤，滯留西雅圖機場，領隊迪馬堤奧就拉大隊落機，喺停機坪輕鬆操練一番。雖然場面都幾搞笑，不過車仔眾人都好認真，拉吓筋伸吓腳之餘，又衝刺跑。或者因為機場條例，車仔班人就冇攞波出嚟踢，如果唔係，以一眾球星腳力，真係打架飛機落嚟都得。
魔獸申花處子戰交助攻
另外，車仔今夏好大手筆買人，巴西中場奧斯卡杜斯山度士交易hold住外，車仔仲想收購埋另一森巴兵韋利安，不過仲同烏超薩克達討價還價。
車仔喺美國備戰，舊將杜奧巴亦喺中國開展另一階段。周日中超上海申花作客廣州富力，「魔獸」杜奧巴「地標戰」只列後備，另一車仔舊將安歷卡就以隊長身份帶領申花。富力上半場把握莫伊塞斯擺烏龍，領先1:0；半場申花教練巴迪斯達換入杜奧巴救亡，魔獸曾主射40碼超遠罰球，僅被富力門將程月磊撲出。68分鐘杜奧巴直線妙傳，曹贇定扭過程月磊射入，申花追成1:1平手，魔獸處子戰就有助攻，算有交代。