上周nowTV舉行歐國盃慶功宴，本來諗住擦餐飽就走；豈料過程相當愉快，還有意想不到的餘興節目。開餐前先致送紀念品給廣告客戶，到杜蕾X公司代表上台，不知為何全場觀眾起哄鼓掌！陳姓代表下台時，司儀Keyman仲玩嘢：「唔該晒杜生……噢！Sorry陳生！」又笑咗。
臨近尾聲，精采餘興出現。歐國盃期間由李克勤與梁榮忠主持的「叻人講波」環節甚受歡迎，最精采一集為二人扮演大哥瑜和招積sir，重演當年TVB的「足金X猴」片段。
未經過濾的足本版，雖在youtube已重溫過無數次，但由近30圍枱逾300位賓客一齊透過大電視重溫，實在是前無古人，當晚大會竟然真的把它播出來，招積Sir讀出「關鍵字」一刻，那股全場爆笑的震撼，實在非筆墨所能形容，成為全晚高潮。最抵死的是，司儀梁榮忠與Keyman捉了兩位主角大哥瑜和招積sir上台齊齊講感受。正如大哥瑜所說，講波生涯能為大家帶來咁多歡樂，有咩所謂？兩位大師級人物，在球迷心中已奠定神級地位！
至於克勤與忠仔的重演金猴片段，在youtube點擊率已逾11萬次。回想起來，能夠促成其事，除了眾人夠玩得，還要「叻人組合」克勤與忠仔，以及「金猴組合」大哥瑜與招積sir同時出現在一間電視台做足球大賽，還要不是在TVB，才能成事，各項元素缺一不可。學桂神話齋，真係「有今生，無來世」咁難得！
方柏翹
now足球評述員