中銀香港信託董事長吳亮星睇怕坐定笠六，好高機會自動當選做新一屆立法會金融界議員，唔少賓架認為佢曾經喺97至04年做過議員，有議會經驗，本身又係好好先生，有信心佢做咗議員之後會勤力做嘢。照咁講，潛台詞係佢起碼唔會「三點不露」？
做咗27年金融界議員嘅李國寶一話唔玩，即刻點名支持吳亮星接棒，據聞，滙豐、渣打兩大陣營都支持吳亮星，即係話三大發鈔行都同一陣線。口痕賓架估計，吳亮星得到幾間大行簽名支持，基本上搞掂本地勢力，外資行又唔得閒出嚟搞事，喺無對手下自動當選機會好大。
好好先生做好議員
賓架們對於吳亮星亦有啲期望，雖然寶哥哥始終係名門望族大老闆，吳亮星同佢級數唔同，但有心接棒應該會更加勤力做嘢，至少出席立法會會議嘅時間，吳亮星一定會長啲囉。