賓架S突然來電，話是日有空，可唔可以一齊吃午飯，真係啱啱遇着剛剛，左丁山呢日亦無約會，叫咗辦公室助理去買九記牛腩與麥奀記雲吞，收到來電，連忙WhatsApp助理，叫佢唔好買外賣。
咁去邊度好呢？賓架S係美國人，係美國會所會員，佢話美國會所有位，唔駛預訂。美國會呀？除咗有無敵海景，普普通通啫噃，不如去陸羽飲茶，賓架S聽見，連忙叫好，中菜更好食啦。於是齊到陸羽食叉燒包、牛肉燒賣、豉椒蝦球炒麪，賓架S一味話好，東京食唔到咁話。賓架S太太係日本裔，已放棄美國籍，而賓架S過往十幾年都住在日本，在東京咗買樓，以後唔返美國咯。美國有乜好呀，賓架S自己一時之間都講唔出，佢每兩個星期返東京一次與老婆渡周末，話香港與東京直情係世界兩大最宜居城市，方便到不得了，想話遊山玩水，香港更加容易，半個小時就要山有山，要水有水，想話有美食呀，跟丁新豹博士行荷李活道與威靈頓街睇香港古蹟，沿途食店林立，可以吃之不盡。呢，陸羽所在地（史丹利街）就係一百年前反清宣傳基地「中國日報」舊址嘞！
講起銀行，賓架S話臨退休前二十年適逢金融亂世，1997至今已有亞洲金融風暴，科網股爆破，次按危機，金融海嘯，歐債危機，依家又發生LIBOR醜聞，賓架少啲定力都會俾洪流捲走，企得穩嘅賓架亦會身上沾滿污泥，聲譽面子俱失。左丁山話：「不過你仲未死得噃，倫敦鯨都俾人劏咗啦，你靠乜板斧呀？」賓架S話：「做人唔好太聰明，笨笨地就得嘅嘞，笨人就唔會識得咁多CDS，衍生結構產品呢一類，可以避過一劫，我在耶魯讀書讀文科，數學麻麻，過去十幾年唔做highflyer，反而可以生存。」講起耶魯，最著名之股市策略師BartonBiggs（碧斯）就係耶魯校友，主修英文，不是甚麼環球商業（幾十年前亦唔興），碧斯上星期逝世，聞者惜之。耶魯到新加坡辦大學，叫做Yale-NUSCollege，今年四月十一日在新加坡成立，按照新加坡規矩，不准學生在校搞政治活動，令不少耶魯教授不滿。賓架S話：「身為耶魯校友，我都唔知耶魯去新加坡做乜，好多校友都唔滿意，直情係多此一舉！」亞州學生入到Yale就話威威啫，Yale-NUS究竟為乜？可能被人取笑㖭。