新地(016)大股東兼兩位聯席主席郭炳江同郭炳聯俾老廉請飲咖啡單嘢，3月底爆出嚟至今差唔多有4個月，兩位郭生又出信又現身穩定軍心，公關部亦有做嘢，不停sell鱔稿，好想穩住新地嘅良好形象，可惜傳媒一般對鱔稿無乜興趣。
地產商嘅鱔稿通常話自己啲項目攞到乜獎物獎、搞咗咩公益活動咁，通常望吓就算。之但係，華華發現新地公關近月相當落力跟進鱔稿，每出一份鱔稿都打電話嚟問你有無收到、會唔會見報咁，有時心急到中午就打你手提電話問你收唔收到，以為你會隨時隨地睇公司電郵!
郭三代見人更實際
華華明白，新地最近不停俾負面新聞困擾，公關職責在所，梗係想有啲正面嘢宣傳吓，但真係行唔通囉，搵兩位幫阿爸做替代董事嘅郭氏第三代出嚟講幾句，俾股東衡量吓佢哋掂唔掂仲實際啦。