將會為美國出戰7項游泳項目嘅「女版費斯」法蘭克琳（MissyFranklin），17歲女年紀輕輕玩奧運，應該係值得開心嘅事；但係因為上星五科羅拉多州戲院槍擊案一事，搞到佢呢兩日精神唔太穩定，可能從此怕咗《蝙蝠俠》㖭，隨時影響嚟緊倫奧嘅表現。
點解佢會咁唔開心？皆因事發地點奧羅拉，就係佢家鄉。法蘭克琳接受訪問時話：「我打畀我啲朋友同屋企人，問佢哋究竟咩事。好多人受傷，好多人受影響，簡直令人心碎。」最大鑊係佢屋企同間戲院距離好近，仲係佢去練水嘅必經之地。佢話：「我屋企同戲院車程都係15分鐘，我每日去練習都會經過嗰度，真係同我屋企好近㗎。」
情緒狀況大受關注
擁有短池200米背泳世界紀錄嘅「女版費斯」，表示唔明點解會發生今次做成12死58傷嘅悲劇：「太令人難以置信啦，點解啲人要做埋啲咁嘅事。」
美國泳隊已經密切關注法蘭克琳嘅情緒狀況，等佢可以盡快平復心情，專心出賽。佢教練史密茲同傳媒講，已經安撫過法蘭克琳，仲話：「就目前情況，全隊都冇人知道有冇認識嘅人在場。」
美國泳隊主力嘅法蘭克琳，就話家可以做嘅就係全力比賽：「我可以做嘅就係出戰奧運，贏金牌令到科羅拉多州可以驕傲，可以暫忘傷痛。」佢話奧運之後，會喺自己右臀紋身。紋咩就冇講，不過應該唔會係蝙蝠俠個標誌囉。