蘋機會：揀套　抗Phone濕

蘋機會：揀套　抗Phone濕

香港人食碗麪都要即影即上fb，莫講話行街食飯入廁所，就算去沙灘泳池嬉水消暑，都硬係要有部智能手機平板電腦跟身，先有番啲安全感。今日嚴選幾款防水保護套，花你十零分鐘睇完篇文，好過你亂揀中招搞到「Phone濕」悲劇收場。

撰文：鍾礎鴻
攝影：陳盛臣
模特兒：[email protected]

防水套講究好處多

去沙灘玩帶住iPhone、iPad，咁貴重梗要好好保護，一方面機不離身避開沙灘老鼠，另外最重要係將Whatsapp打機聽歌fb影相，全部變晒水上活動。阿媽都知防水產品首要係保護性足夠，但咪以為佢哋淨係得防水功能，好多仲兼具防塵甚至防撞「分唇」，而部份專業產品更達國際認證，例如IP68係指產品通過防塵防水標準，裝置可於兩米水深下如常操作；MIL-STD-810F516.5就指美軍標準，達標產品通過抗震防水防雨防雪測試，選購時你就唔會任由Sales亂點。另外，沙灘鹽份高鹹氣重，同時砂粒又有機會刮花手機，所以加個防水套令你玩得安心又放心。

■讓你更安心邊曬太陽邊聽歌，除普通耳機，亦可另配真正防濕嘅耳機。

■平貴防水產品之分別，就係隔咗層膠有否影響輕觸操作。

■有咗掛頸式防水袋，手機同廿蚊雞髀錢都可隨身攜帶。

■用軟身防水袋的話，貼面度便成重要一環，事關會影響觸控靈敏度。

冲浪五分鐘

使用任何防水裝備前，最理想是放入紙巾測試一小時，太急趕的話亦至少濕浸五分鐘Test一下，確保無入水先放入手機。用完後亦應放在陰凉地方風乾，曬乾的話好易爆膠影響防水效能。

1.三重防護

呢款iPhone保護殼特別在顏色有黑及黃，十分Sharp醒。裝拆過程有點煩，首先扭下兩粒大螺絲，打開外層顏色蓋，裏面仲有矽膠套及首層保護殼，煩就煩啲，勝在安全嘛。

■Candles（$580/a）

■兩粒大螺絲鎖緊第一重外殼，要用一蚊銀先開到。

■內裏紙巾無濕到，三層保護效果理想。

90分扣分位：裝拆較煩

2.至強美軍四防

具防撞防水防塵及防雪四防功能，全部經過國際認證，最貼心係耳機位、傳輸頭都有獨立開合，加上鮮色機殼，懶人大可索性只裝不拆，返工返學至型係你。

■附耳機延長線，唔插耳機時記得擰實螺絲保護塞。

■LifeProof（$698/b），Armband配件（$450/b）

■冲浪五分鐘，再凌空兩米飛掟，手機原好無缺，美軍四防標準果然名不虛傳。

95分扣分位：稍貴

3.兼容性高

具IPX8防水認證標準，配上頸繩攜帶方便，而且極之輕身易收藏，同時提供大碼款式，供平板電腦使用，乜機都啱用。

■Ecomelife（細$68、大$98/c）

■袋口貼合具黏性，再加捲起黐埋魔術貼，勁安全。

■放入紙巾連機試浸五分鐘，只係袋口外圍有水，袋內全部物件乾爽無入水。

90分扣分位：唔襟撞

泳客濕試

鬼仔B喪Chok
■雖然鬼仔B唔及港孩咁叻，兩歲已識掃iPhone，不過睇佢猛Chok喪掟部iPad都無事，老竇老母以後可以放心喇。

Jerry：
「平時出嚟玩好少戴袋（掛頸袋），試過Ecomelife應該會破戒，皆因佢夠薄，唔會影響觸控快感。」

Bill、Berry
「幾Buy呢隻LifeProof，外形討好又唔誇張，軟膠包圍夠Protective，平日當普通殼用都得，連拆殼都慳番。」

查詢：

（a）三禾電氣（23740718）
（b）LegendDistribution（37489408）
（c）Ecomelife（27599282Ext25）