久違的彭丹，當大家想起她時，可能印象中會記起她是波神，最擅長做一字馬和拱橋，已移居北京的她，幾乎已絕跡香港娛樂圈。上周在北京見到她，發現39歲的彭丹風采依然，還當上導演，好奇問起她還能夠做出一字馬和拱橋招牌動作嗎？她滿有自信說：「當然冇問題，我自己成日有操㗎！」
撰文：葉雪
彭丹在湖南長沙出生，14歲到美國留學半工讀，95年來香港發展，觀眾最深印象是她那一副驕人的魔鬼身材，擁有36F的她獲封「波神」，每次拍照，傳媒都愛要求她表演一字馬和拱橋功架。
出動原始武器
初到香港的彭丹，很清楚觀眾沒時間慢慢發掘藝人的潛質，只有靠自己最原始的武器—身材來讓觀眾先熟悉自己。不過當年她接受亞視清談節目《星空下的傾情》訪問，談到當時拍攝三級片的感受，她說：「拍《六魔女》一場落水戲嘅時候，本來我要求貼乳貼，但導演話多着幾件打底內衣就得啦，但原來我要俾人撕爛衣服，然後浸喺水，結果拍出嚟走光，先知道被騙。」說到這裏，彭丹的聲音哽咽，淚水一滴一滴流下來，證明每位演員在成名之途都要經歷不少辛酸。
在美國讀電影課程的彭丹，在香港走性感路線非她所願，直至內地影市開放，99年彭丹回到內地發展。先在《開著火車上北京》中打響名堂，之後再接拍一連串的內地連續劇和電影，這幾年的演藝重心都在內地。
近年衣着樸素
日前在北京電影製片廠找到彭丹，淡掃娥媚，衣着樸素，戴上近視眼鏡在剪片房為自己執導的新戲《南泥灣》剪片，真的認不出她曾經是香港叱吒一時的波神。彭丹表示：「呢幾年我喺內地發展好開心，可以嘗試做導演，《南泥灣》我仲有份投資同演出，家可以真正做到自己喜歡的工作，好滿足。」
這幾年彭丹在內地接了超過十幾部電影和電視劇，加上投資有道，在香港和內地買賣房子又賺大錢，現在已經是一個小富婆，說到身家，彭丹謙虛說：「三餐唔愁啦！唔算好有錢！呢幾年我喺內地真係做到冇停，不過我唔介意辛苦，因為我唔使好似以前喺香港咁，一味走性感路線，去表演一字馬引人關注，我喺呢度可以試唔同角色，可以做更深層次嘅表演，之前走性感路線，只不過係一個過程，波神對我嚟講係一個稱呼，唔會有特別感覺。」
在北京生活了7、8年，彭丹更低調，她說：「除咗做嘢，我幾乎都好少出嚟，唔多願去應酬，以前我喺香港生活都係咁，家好少返嚟，香港冇乜發展空間啦！不過每年總會返嚟幾次探吓親人，但每次都係留一、兩日就走，所以都冇乜搵香港啲圈中朋友，不過每年志偉主持嘅《獎門人》會叫我返嚟做嘉賓，我都會畀面去玩吓，志偉話每次我做嘉賓嘅一集收視都會提高。」
唔識香港模
對於近年模在香港千方百計想上位，一代波神彭丹並不關心，她表示：「講真每個樣都差唔多，唔係好突出，叫我去認真係難，同我嗰個年代始終唔同。」
彭丹的感情生活一直好低調，雖然這麼多年追求者不少，但她到現在還是獨身：「我未結婚，感情一片空白，可能因為太忙，根本冇時間拍拖，家我日日都係同導演、編劇、攝影師一齊，開會開到頭昏腦脹，原來做導演真係好困身同辛苦，但一部戲出嚟成功，又會好有滿足感。」
