2011/2012馬季完畢，各路英雄各散東西，歇暑去也，不過馬季愈來愈長，放假時間就愈來愈少，九月八日星期六就開始下一個馬季咯，即係話八月份已有馬匹全面操練，你話趕得幾緊要呢！新馬季開鑼點解要揀在星期六而唔係九月九日星期日？冇法子啦，立法會選舉大過天，賽馬日要讓路，否則遇上低投票率嘅話，啲政客賴咗賽馬，馬會點擔當得起？
七月十六日，馬季結束後一日，《賽馬天下》（RacingWorld）就在快活谷馬場快活看台廂房舉辦酒會，慶祝創辦三十六周年紀念，並為一代短途馬王「蓮華生輝」出版紀念專輯限量版，其中一本拿出來拍賣，經一番競投，喊價去到二萬元（叻先生、邦先生、勇先生、好先生馬主史立德叫價）之後，以為冇人再投，點知蓮華生輝馬主冼鏡煜將價錢嗌到三萬，有志在必得之勢，一班馬主梗係無謂奪人之美，縮晒手啦，後來吳嵩話攞個意頭捐多3800元，湊夠33,800元，捐俾RDA（傷健策騎協會）。
賽馬天下在一九七六年由奧馬勝創辦，一九九○年時由左丁山接手做董事總經理，眨吓眼過咗二十二年，賽馬天下輾轉落在吳嵩手上，佢與奧馬勝同樣係馬匹血統專家，對賽馬好有研究精神與熱情，不過以前奧馬勝自己一手包辦編務與生意，家吳嵩就請咗幾位八十後與七十後年青人掌舵，佢自己就南北半球周圍飛去睇國際大賽與選購馬匹，咁嘅生活，多姿多采過做會計師/核數師多多聲啦。在酒會現場嘅會計界女強人（已退休）方黃吉雯都對左丁山講：「吳嵩性格唔似會計師！」想當年，佢在澳洲讀商科、會計，得MBA學位與澳洲會計師公會ASA銜頭，做做吓會計師，竟然聽咗左丁山講，放棄澳洲會計師專業生涯，返港講馬，竟然講出一片新天地，實乃異數。
在場亦有南半球著名販馬公司Inglis嘅亞洲代表PeterTwomey在，佢長駐新加坡，特登飛過嚟參加馬季煞科日與賽馬天下酒會，點解有咁大興趣？原來Inglis每年在澳洲拍賣會，賣出2000隻馬以上，而兩隻世界短途馬王「蓮華生輝」與「魚子精華」都係出自Inglis拍賣會成為Inglis生招牌嘅，故此Peter梗係捧蓮華生輝場啦！