每年聽唔少，明明好少上網，但旅行返來之後收月結單，竟發現費用高達數千，甚至過萬！唔係嚇你，既然迴避上網都唔係辦法，倒不如學精啲，慳住荷包之餘，又可盡情地上facebook、睇新聞，煲YouTube！今日先達人教你自保方法，Set好手機，萬一流量爆錶，亦唔怕枉交月費。
記者：陳國輝
攝影：譚盈傑
模特兒：Irene@Zmodel
1.Android4.0.4可限制流量
經常「爆Plan」原因，多數係唔留意數據用量造成。想學精啲實手機流量，唔通吓吓Check住咁麻煩？咁又未必。先達阿傑教路，除咗「超Low-tech玩法」係將GPRS功能熄晒外，仲可把平日會自動更新嘅Apps關閉，以免佢肆意撈Data。以iPhone為例，喺「設置＞通知」入面，可將天氣Widget、日曆、GameCenter等會自動提取Data的功能關掉；而採用最新系統Android4.0.4，例如GSIII，更可自行限制數據使用量，萬一進入「警戒線」，手機就會警告你，咁就唔使驚爆煲啦！
至於其他AndroidPhone用家，佢建議最好自己上PlayStore下載可控制數據量嘅Apps，當然，邊一類最適合你用，就要慢慢Search喇！
2.鴨記掃八折漫遊卡
摸熟各項手機設定，避免中招固然緊要，但謹慎啲，好多人會選購漫遊卡，碌爆就算。上台、各地手機店都提供各式各樣漫遊儲值卡，但唔講唔知，原來深水埗鴨寮街有大量折扣儲值卡畀你揀。好似3HK推出嘅「3G循環儲值卡」，面值$198，再包一日漫遊數據無限用，但係「鴨記價」只賣$160，甚至仲有價講㖭！另外，仲有一款「末日卡」，佢最大分別係使用期限通常為12月31日，即係得4個月左右用，因此價錢特別平，但留意大部份屬網上私人發售，好似「uwants」、「HKEPC」等網站都見過。
3.上台比拼 $98任玩4G最抵
當然，未必人人有充裕時間上網格價，又或者嫌儲值卡麻煩，倒不如留意上台Plan好過！若然想玩得又抵、又安全，唔使諗肯定係全日Pass，但查詢發現，有幾間網絡商同樣只提供$168全日任玩服務，否則就要逐KB計，埋單實好甘！不過，最近有網絡商推出激平優惠日費，例如中國移動香港就有$98全日任玩，而且提供4G速度，論價錢肯定屬各台至抵，但要注意呢項服務僅限韓國地區使用，至於歐洲、美加等地，就要繼續硬食超貴數據流量，又或者申請低數據量月費，例如PCCW的$88包20MB之類，只夠你Check吓電郵，慳住來用！
