今晚7點半杜奧巴大戰耶高保呀！唔係英超開鑼，係中超大戰嚟㗎；耶高保帶領嘅廣州富力主場鬥有杜奧巴壓陣嘅上海申花！申花證實，杜奧巴肯定會喺呢場粵滬大戰上陣，各位想近距離睇魔獸嘅球迷，快啲上廣州撲飛嘞！
最少踢半個鐘
之前申花班主朱駿大大聲咁話，杜奧巴會喺今個月18號嘅中國足協盃作客長春亞泰入面處子登場，點知嗰場杜奧巴連後備都冇份，畀佢fake晒！申花教練巴迪斯達出嚟解畫，佢話杜奧巴上場覺得自己狀態麻麻，所以唔想上陣住；巴迪斯達補充，喺嚟緊對富力嘅比賽，杜奧巴會踢半個鐘左右，寓賽於操。若果申花今次冇吹水，今晚就係魔獸嘅中超處子戰！
除咗球迷興奮，富力射手耶高保都好期待呢次對決。據當地記者透露，耶高保私底下已經同杜奧巴約戰；同埋佢哋識咗好耐，感情好好，相信比賽完之後，會搵機會一齊飲吓嘢、傾吓偈。耶高保好快就融入咗富力，首次上陣就有入波，幫富力贏恒大1:0，上周中嘅足協盃，佢都有進賬，可惜球隊最終輸波出局，但兩場入兩球，都睇得出耶高保着晒火！
場波今晚7點半喺廣州大學城體育場上演，但因保安原因，呢個坐到50,000人嘅球場只會賣20,000幾張飛，想睇就快啲撲飛嘞！