雖然「萬人迷」碧咸勸告美國男籃要早啲適應英國天氣，不過美國大軍仍然好少理，上星期五飛抵西班牙巴塞隆拿，打多兩場表演賽先出戰奧運，包括周日面對04奧運冠軍阿根廷，鬼咩，都係錢作怪。（now635台明日3:30am直播）
美國隊上個星期四先喺英國曼徹斯特輕取東道主英國118:78，洛杉磯湖人後衞拜恩賽後仲特別多謝碧咸：「碧咸特別吩咐我，嚟到英國要帶遮同雨褸，因為呢度經常落雨；雖然我都唔怕，但落起雨嚟真係有啲凍，好多謝碧咸嘅提點。」
先鬥阿根廷再對狂牛
奧運仲有5日就開幕，美國隊理應留喺倫敦適應又濕又凍嘅天氣，點知佢哋大軍只留喺英國幾日，又要轉戰西班牙，應付埋奧運開打前最後兩仗熱身賽，周日先鬥阿根廷，到周二就對西班牙；雖然西班牙天氣好好，成支美國隊喺加泰隆尼亞美術館影威水大合照㖭，胸有成竹好似贏硬咁，但飛嚟飛去點都有啲攰。又係嘅，鬼叫美國隊個名響，搵佢拍跳戲金起碼百萬美元計，連練波都要賣飛，賺盡籃球迷啲錢。
阿根廷同西班牙，都算係美國今屆爭標大敵，紐約人前鋒安東尼有份參與京奧決賽擊敗西班牙一役，都深感狂牛先至係美國最大對手：「喺目前階段，西班牙係我哋嘅最大對手，佢哋擁有不少具天份球員，亦有豐富NBA經驗，我相信今屆如果再對西班牙，戰情較4年前更緊湊。」