講開又講，新地(016)今年仲未有一個大型新盤開售，原本話今年4月賣屯門瓏門，講到家都未攞到預售樓花紙。
華華早幾日行經瓏門，見到個別座數開始拆棚，話唔定等等吓，等到出年賣現樓都未定。
新地一早吹風話4月賣瓏門，爆出兩位聯席主席郭炳江同郭炳聯被老廉調查之後就無乜下文，長實(001)5月話賣將軍澳峻瀅，6月底批出預售樓花紙後已經賣咗過千伙，可謂遲來先上岸。
市傳新地希望9月賣到瓏門樓花，最壞打算等到出年賣現樓。如果真係咁，最失望嘅應該係「樓神」雷霆，佢4月由新地代理執董升做新地執董，今個月中再升做副董事總經理，半年升職兩次都未有機會表演賣樓絕技!