唔好以為剩係踢波打籃球先搵到大錢,英國七項全能女選手恩妮絲(JessicaEnnis),今年剩係贊助合約都值成100萬鎊(約1,200萬港元),可以話係吸金女王!
26歲嘅恩妮絲家每日都加緊訓練,以應付倫奧,睇佢出入嘅交通工具就巴閉嘞,係英國名牌積架XKR跑車,價值78,930鎊,差唔多成100萬港紙一部;不過,其實恩妮絲一個仙都唔使出,因為架車係積架送嘅。
贊助商間間猛料
睇番佢啲贊助商,間間都好猛料喎,除咗積架之外,adidas呢啲運動名牌當然走唔甩啦,另外仲有英國石油、英國航空、跨國保險集團Aviva、名錶Omega、護膚品Olay等等;加加埋埋今年贊助收益有成100萬鎊咁多,相當和味,而其中以Adidas最大手筆,一年贊助費高達32萬鎊。
咁得贊助商歡心,其中一個原因,係恩妮絲都相當識幫自己包裝;啱啱就為男士雜誌《GQ》拍封面,增加曝光率,唔怪得贊助費年年上升啦。佢上年先得70萬鎊,今年已升到100萬;仲有專家估計,如果佢拎埋奧運金牌,下年贊助費肯定過百萬,真係富貴過唔少英超球星!
七項全能金牌大熱
而且恩妮絲本身極有實力,可以話係最頂尖嘅七項運動員。佢今年喺奧地利格齊斯嘅比賽,造出6,906分,係歷史上第8位做出超過6,900分嘅選手;同時亦係今年最佳成績,所以佢絕對係倫奧嘅金牌大熱。