最近一周留意一個莊家系股份，成交及股價大躍進，威利國際（273）六個交易日股價喪升1.9倍，有三日打入10大升幅，兩日晉身20大升幅榜，同系其他股份亦升到你唔相，萊福（901）飆75%，合一（913）漲53%。大升背後無原因，且有成交配合，是否追得過，抑或要退避三舍，睇完以下升跌榜解構，可能你自己會有答案。
逾千隻港股中，一般炒友會睇股票機搵對象，最鍾意睇20大升幅或跌幅。股榮統計今年至上周五，頭10大升幅及跌幅股份，然後對比今年股價表現，歸納出股份上榜率越高，表現越衰；反之，今年股價升幅超過一倍或以上股份，上榜率極少。
今年至今合共有141個交易日，上榜率（10大升幅榜或10大跌幅榜）最高是中國金融租賃（2312），合共有16次，平均每11日會見到佢入榜，股價年內累跌95%，巧合地是表現最差港股。同樣上榜16次的有彩娛（8022），年內跌價87%
有麝自然香 低調有賺剩
要注意上榜率超高樣衰股，並非齋入跌幅榜。以中國金融為例，打入10大跌幅榜有11次，跌幅介乎9%至62%，不過該股亦是10大升幅榜常客，漲幅介乎13%至29%。入10大升跌榜比率約1：2。有個別例子如志道（1220），入升幅榜（七次）更多過跌幅榜（五次），因此大家不要以為入得多升幅榜，就係好嘢，分分鐘瀨嘢。
睇完衰股望吓好股、倍升股有甚麼特徵，答案係夠低調。今年表現最好股份暫時係綠城中國（3900），年內累積升168%，但奇怪是，該股只有一天打入10大升幅榜，就是九倉（004）宣佈入股綠城翌日，單日進賬33%，然後大漲小回，長升長有。統計10隻今年升幅超過一倍的港股，同樣是靜靜起革命，新世界中國（917）未曾打入過升跌幅榜，股價升到你唔信。
一句可以講出箇中原因，「你有好嘢，都自己收收埋埋，唔想俾人知」，同樣道理，一隻質優或轉勢的股份，基金自然慢慢收貨，不想太過高調引來散仔爭貨，有麝自然香，低調有賺剩。相反，大鑼大鼓話人知，我隻股俾人掃緊，咁我反而怕怕。
畀多少少資料給大家，威利2004年至2011年共八年間，16次配售、3次供股、4次發可換股、1次發售認股證，抽水24次的公司，股價六日內飆兩倍，是否有後着，大家自己判斷！
股榮