繼6月後，四叔又叫人借孖展炒地產股，仲話上次講完後，地產股升咗十幾個巴仙，回報好和味。魏力唔敢話四叔「老點」散戶，未來地產股真係升爆廠都唔定，不過，炒股票是一世的遊戲，要長炒致富，先要學識管理風險，否則贏埋都唔夠輸！
炒股最難克服的是「愛獲利、不肯止蝕」的心態，試想你用100蚊炒10次，梅花間竹咁5勝5負，每次賺蝕都係10%的話，唔計手續費，埋單都要輸5蚊（5%）。所以要長炒有錢贏，止蝕一定要比止賺定得嚴謹，否則炒出炒入，都係白忙一場。
就當用五成孖展炒，100蚊本金當200蚊炒，炒10次贏輸各半，以10%作止賺止蝕，埋單會點？得番190蚊，還埋100蚊孖展，未計利息及使費，本金就唔見咗10%。目前市況半死不活，用孖展炒股風險更高，在大牛市前輸掉本金，翻身都難，更遑論致富？
睇番個市，中資電訊、鐵路及醫藥股都好強勢，內房股就急回；莊家殼股好活躍，相信同市場冇方向有關，不代表後市會急跌。炒作上，戰友可留意主攻心腦血管藥物的四環醫藥（460），早排急升後以旗形整固，回落至10日線已見支持，上周五疑似突破，成交急升，待升穿3.10元可以追入，短線睇3.40至3.50元。
魏力
http://www.facebook.com/2012jason