對於一個世界級跑手來講，要喺20日內贏3次，真係唔難，但要以同一個時間勝出，就唔係咁易做到；不過，美國110米欄好手A米列特（A米）居然可以喺21日內3次跑出12秒93，唔知嘅真係以為佢係機械人，唔怪得連劉翔教練孫海平都怕咗佢啦！
去年年底開始改用7步上欄喺美國欄王A米列特上個禮拜五喺鑽石田徑聯賽摩納哥站，擊敗同鄉李察遜同埋奧利華，以12秒93奪冠，仲平埋自己喺今年做出最佳時間，同埋刷新咗大會紀錄。
孫海平：佢好可怕
A米近況咁弗，由佢勝出唔係乜嘢特別事，但奇就奇在居然可以喺20日之內，3次跑到12秒93（見附表）；巧合成咁，睇嚟有關方面唔係要捉佢去驗血，而係要捉佢驗腦，睇吓個頭裏面有冇裝咗電腦程式。
A米嘅穩定表現，連孫海平都話佢好可怕，而且肯定係劉翔喺倫奧嘅最主要對手。孫海平話：「可能大家唔係好瞭解，但其實A米早喺兩年前，喺美國嘅知名度好高，仲出名過奧利華，只係佢呢一兩年因傷冇乜點比賽，啲人先唔識佢。」
A米已成奪金大熱
孫海平補充話：「從呢半年嘅表現嚟睇，A米嘅進步的確大，而且個勢仲勁到嚇死人。今屆奧運110米欄嘅競爭會非常激烈，好多選手都表現出非常高嘅水準。除咗A米列特之外，李察遜嘅表現也一直好穩定。對我哋嚟講，最重要都係做好自己，提高劉翔嘅水準。」
A米21日內跑3次12秒93後，博彩公司威廉希爾亦將佢列為2倍嘅奪金大熱，劉翔就係2.5倍嘅次熱。
綜合中國及摩納哥外電
A米列特近3周
110米欄成績
30/06美國尤金
12秒93
13/07英國倫敦
12秒93
20/07摩納哥
12秒93