咪以為淨係明星先會扮大牌，原來運動員一樣會。好似牙買加飛人保特咁，佢家陣同隊友喺伯明翰大學備戰，但就大牌到死；吩咐保安唔准畀人騷擾佢哋練習，亦唔准影相，搞到一心嚟睇「閃電」嘅fans，鬼咁冇癮。
京奧100及200米跑金牌得主保特，自從喺一星期前抵達英國後，就一直同自己牙買加隊友甘普爾、禾漢比歷克等，喺伯明翰大學練習。難得有體壇巨星喺自己校園集訓，班學生哥當然好開心；點知保特扮大牌，閉門練習之餘，仲慌死俾人影蝕，居然吩咐啲實Q唔畀人喺校園影相。禮拜四有粉絲同記者喺樹叢之間，偷睇保特練習，在場保方即時好惡大叫：「呢度係私人地方，你哋唔准喺校園範圍影相！」另一個保安就咁講：「唔准偷睇啲運動員。」
一個自稱彼得嘅粉絲就好失望咁講：「呢度係我哋嘅國家，我哋嘅奧運。我入嚟大學就係為咗睇保特，但居然唔畀睇。」而大學生威爾遜就話：「我爬過道閘，望到保特一眼；我真係好鍾意佢，佢啟發我好多！」至於伯明翰大學嘅傳訊主管珍娜夏莉，就為事件降溫：「喺7月24號，傳媒朋友會有機會同班運動員影相同做訪問。」
保安員瞌眼瞓即炒
話時話，保特班實Q雖則好惡，但起碼都盡忠職守，唔好似負責倫奧保安工作果間公司G4S咁，有員工喺執勤時瞌眼瞓。呢個保安負責守住曼巿嘅萬豪酒店門口，到時傑斯等英國隊球星會喺度住；咁唔稱職，下場梗係俾人即場炒魷啦！