【亞洲之旅-香港站】阿仙奴周六會起程去亞洲進行3場友賽，包括29日喺香港大球場對港甲冠軍傑志。但據英國BBC報道，28歲嘅尹佩斯唔會隨軍遠征亞洲，令唔少「被騙」嘅港迷既失望又憤怒！
冇傷冇病都唔嚟
BBC周五報道，曼市雙雄及意甲盟主祖雲達斯，皆出價1,500萬鎊（約1.8億港元）求購阿仙奴前鋒尹佩斯，足足比兵工廠預期嘅3,000萬鎊少咗一半。最令廠迷憤怒嘅，唔係領隊雲格又賣星，而係呢位荷蘭射手冇傷冇病之下，竟然宣佈唔來港出戰亞洲之旅嘅第3站；難為近40,000名已購票、一心想親睹偶像喺大球場英姿嘅球迷，最終都要失望。《香港討論區》網民MansPocky話︰「佢留低嘅可能性……大家心中有數，但畀佢嚟亞洲，當係畀球迷一個回憶都好吖！佢哋（阿仙奴）要考驗我哋嘅忠誠到幾時呢？」
伍健：未收到通知
不過，就算英國傳媒話尹佩斯唔會東征，但係傑志總領隊伍健昨日回應時，就話仲有變數︰「我哋同阿仙奴係有合約，指尹佩斯等5名星級球員必須隨隊訪港作賽，否則要賠償；更重要嘅係，直至目前為止，我哋仍未收到阿仙奴嘅通知，話尹佩斯唔會訪港。」伍健昨晨領軍督操時又提到，阿仙奴小兵阿歷士張伯倫、新兵基奧特等球員，都肯定訪港出賽。