特首梁振英好心做好事抑或好心做壞事呢！剛剛公佈白表家庭（月入三萬元以下）於明年一月一日後可免補地價購二手居屋單位，居屋新政策刺激樓價，激活居屋轉流量帶動私樓上車盤活躍，每年名額5,000個。從客觀角度，以上措施可以令居屋業主有5,000名準買家，可以令自己逃出生天，終有機會考慮購買私人樓宇！因為居屋最年青樓齡都已有十年，好多居屋都已經供滿，冇銀行會揸現契，而居屋原裝用料比私樓相對比較差，浴室廚房地板都夠期裝修更換，現在物價上升，一般裝修費用動輒最少二、三十萬，又要搬出一、兩個月讓工人動工，非常不便，現在剛好有機會搬去私人屋苑，用料相對好及有美輪美奐會所配套一應俱全，提升居住環境及生活質素！而最重要就是資產增值，因為私樓長遠而言，無論唐樓、洋樓、村屋、大型屋苑、地鐵上蓋物業、藍籌屋苑等，升值一定好過居屋好幾倍，過去好多香港人，換樓成長過程，原先父母住公屋，子女長大後成家立室買居屋，到累積一定財富及自己居屋升值，賣出套現就買私樓，一房換兩房，兩房換三房！此為換樓成長過程，以客觀角度一舉三得，理應造福民生！好心做好事。
最新地產代理市況！絕對唔簡單，因為本身個餅已經唔夠食，以上白表政策，進一步令到居屋及上車盤業主反價封盤，而大型代理行仲表明大肆擴張，直頭係僧多粥少，盲目擴軍，等同自殺！究竟行家個葫蘆賣乜藥呢？作為大行董事，有人打本做生意，贏咗有得分，輸咗最多冇糧出，唔使自己蝕錢，旺番那就擴軍成功水漲船高名成利就，老闆唔係白癡梗係知道董事想法，作為老闆品牌領導人嘅想法就是弱肉強食，目的好簡單要壟斷市場，首先壟斷人才鏈，將敵人對手挖角，做sales的，過檔升做經理，做開經理的，過檔升做區域經理，而狂開分行可以壟斷盤源及客源，大行當然明白逆市擴充有風險，但因為過去有盈利可以蝕頭賺尾，老闆同區董想法不一，但不謀而合，區董想賺多些錢！而老闆想壟斷市場後可將成個餅食晒！道理如此簡單也！
Email：mailto:[email protected]