近年沉醉打羽毛球的葉蒨文（沙麗），相距八年後，再次在香港開個唱而再度活躍起來。為工作，沙麗積極備戰，做足一百分，但原來她不曾對自己的歌唱事業着緊過，即使身為樂壇天后時，都只求過無花無火的生活，最怕與人鬥，只望瀟灑走一回吧了。 撰文：羅美倫
曾是八十年代樂壇天后之一，現年50歲的沙麗終回歸香港樂壇開演唱會，近年多在內地演出；在香港只過開心、簡單生活，對樂壇不大關心，沙麗說：「講真，冇乜留意，只知陳奕迅活躍，我生活好忙，起身食早餐、睇自己鍾意睇嘅電視、同朋友午飯、做運動或做其他嘢，夜晚再運動，返到屋企攰到乜都睇唔到。」要沙麗數樂壇新人確是件難事，她口中的「新人」仍包括容祖兒、薛凱琪、謝安琪，她笑言：「自己唔唱唔做呢行就冇去留意發生緊乜嘢事，只係洗頭至睇吓八卦雜誌。」
唔識樂壇新人
樂壇新人如走馬燈，早前在頒獎禮，令半退休的沙麗跟他們有機會接觸，是個不錯的經驗：「有個嚟同我hello嘅都幾紅，但我唔知佢叫乜名，長頭髮幾出名㗎……眼大大……啊林欣彤，另外我識G.E.M.，女仔真係少咗啲，男仔兩個字嗰個……林峯，唱得幾好。」繼子林德信（Alex）有機突圍而出嗎？沙麗認真的說：「佢有機會，我叫佢畀心機去做，要勤力同有突破，執吓啲唱歌方式，我以前唔練歌，家發覺練歌幾緊要，耐唔唱把聲會生鏽，我家開始不停練歌，佢更加需要，佢仲後生，未識控制把聲。」
追求簡單生活
不用工作時，沙麗在香港好好享受生活，每日做自己喜歡的事，見喜歡的人，她坦言滿足現狀：「我一路都注重享受，生活係自己設計鋪排，事業係好緊要，但生活都緊要，就算以前我睇重事業，但都鍾意簡單嘅屋企生活；最紅時都鍾意返屋企同朋友見面，家都冇變，追求簡單、冇花冇火嘅生活，做緊自己鍾意做嘅事已經有花有火啦！」
2010年獲港台頒金針獎，將沙麗升上另一階段，是否太早攞此獎變得沒有鬥心？她哈哈大笑：「多謝喎！我都唔覺自己後生，我阿媽都話我老呀！我由朝到晚都冇鬥心過，我想做一件事，做好件事就得，我係同自己鬥，唔會同人鬥，冇得同人鬥，你有嘢好過人哋，人哋有嘢好過你，你同人鬥攰死自己，好似今次決定做演唱會，心機畀晒落去，好唔好係我嘅事，好就多謝大家，唔好就自己孭番，好簡單。」
呻四面台攞命
沙麗做事望做足一百分，但她所要求的不一定是百分百回報，九月的演唱會就只有一個簡單要求：「可以冇瞓低就verygood，我怕自己心臟病發，捱到三個鐘就得。」
雖然沙麗持續有舞台經驗，但只限於三面台，她連日來排舞，已感受到四面台是大挑戰：「跳兩跳都唔知自己喺邊面，兩個師傅喺嗰面我就喺呢面，亂晒籠，四面台真攞命，唔係壓力大，係方向感呀，全世界只得香港係四面台。」
沙麗知道體能最緊要，現在除了練舞就練氣，羽毛球、拉丁舞都做齊，打高爾夫球人家坐車她行路，沙麗有感而發：「八年前演唱會邊唱邊跳做得到，跑步一個鐘冇問題，家五分鐘就要唞，一到50歲嗰個月，everythingchange！我嘅生命都change！」她的生命隨年紀而改變，但樂天性格始終未變。
髮型：HeibieMok@HairCulture
場地：跑馬地壹玖捌叁中菜廳
一凹一凸需時磨合
與林子祥（Lam）結婚16年，沙麗經常被傳婚姻有問題，她坦言不開心：「會hurt到，但做呢行點都會有呢啲嘢，我覺得提都無謂，我寧願畀時間沖淡，好過講咁多。」
沙麗與阿Lam的性格一凹一凸，但出奇融洽，自有其相處之道，沙麗透露：「我哋畀好多空間對方，婚姻係好得意嘅事，兩個人簽合約話一齊，但實際兩個性格會有啲分別，成長時又會變，好似結婚前我對羽毛球冇興趣，但婚後一定要打，將佢擺喺屋企都要打，因為我鍾意；佢又希望我去打，因佢知我鍾意，以前我八點食飯，但家咪六點同佢食飯，八點至打囉。」
心裏着緊對方
任何相處都需要磨合、調校，沙麗以前打羽毛球打七個鐘，現在只打四個鐘，有時間跟老公吃飯，她再爆老公秘密：「佢冇乜要求，其實佢唔使我陪，佢唔使日日用車，但偏偏日日問架車點，有次突然話要用車，打畀我但我未買完嘢，佢又話唔使，又話自己可以坐巴士，搞到我心唔舒服。」看似各顧各，其實心裏都着緊對方，問到誰遷就對方多一點？沙麗笑說：「哈哈……我覺得我就佢多啲，佢覺得佢就我多啲，呢啲係咪恩愛？我唔知呢啲叫乜，可以任你叫嘅，總之係work嘅！」
