德育與國民教育係可以教，但非必需，一個國家嘅風俗、習慣、成年人之公眾行為，本身已經係一種教育，幼小學生耳濡目染，一定受到影響。《大公報》大公園喺七月十二日有一篇專稿，作者徐悅，講美國的愛國教育，唔該教育局啲高官睇真啲，中聯辦官員更加要睇。
有一位德國猶太裔，生於威爾士卡廸夫市嘅美國公民，叫做MichaelMoritz，在矽谷無人不識，係一位最著名嘅創業投資基金經理人。佢嘅公司Sequoia之二十五年來科技投資，成就驚人，佢曾投資過而賺大錢嘅公司有Google，Yahoo，PayPal，YouTube，eToys與Zappos，Google上市時，就令佢成為威爾斯最有錢嘅富豪。
有咁威水嘅投資眼光，究竟出身如何？在卡迪夫讀中小學，考入牛津ChristChurch書院，攻讀歷史，得到獎學金完成學業。後來去咗美國入Wharton攞MBA，加入時代雜誌做記者，之後離開，到矽谷做創投先鋒，而今名成利就，身家起碼十億美元。
發達之後，點樣用錢？2008年六月，與太太捐咗五千萬美元俾母校ChristChurchCollege，今年七月十一日，更與牛津校監彭定康，牛津校長AndrewHamilton一齊宣佈，佢會捐七千五百萬英鎊（約一億一千五百萬美元）俾牛津大學做獎學金基金，專門提供獎學金俾一啲入到牛津嘅清貧學生。Moritz話：「當年若非某些陌生人的慷慨，我不會有今日！」
嗱，呢啲就係最佳德育與國民教育示範嘞，發達之後不忘本，捐巨資予母校造福下一代嘅「陌生人」，係人生最值得快慰之事。Ｍ先生父母在二次大戰之前，帶咗好多德國猶太兒童逃亡，到咗英國定居，Ｍ先生於1954年出生，憑自己努力，以知識改變命運，再回饋社會，如此社會方能一代比一代進步。香港本地大學嘅畢業生，你地其中有不少已經發晒達，請盡量慷慨，以Moritz為榜樣，捐錢俾母校。好令人遺憾嘅係Moritz今年58歲，診斷後知道患上極罕有，冇得醫嘅疾病，壽命難卜！（資料來自網頁及IHT報導）