天氣反常令英國今年特別多雨水，令人擔心下星期五嘅倫敦奧運會開幕禮，要於天雨下進行；而英國嘅博彩公司有見及此，將倫奧開幕禮遭遇雨天嘅賠率定為2倍。
雖然已經係仲夏，但倫敦嘅氣溫仍然好清凉，天氣預測更指由周五至下周一，氣溫介乎攝氏12至23度；而且，上空更係密佈烏雲，嚟緊幾日都可能有雨。
今年英國嘅天氣極為反常，經歷咗約3個月嘅乾旱之後，由4月下旬起就由「乾」變「濕」，落起滂沱大雨；而喺上個月，更係英國90年以嚟落雨最多嘅一個月。天雨令早前嘅溫布頓網賽，有多場比賽因中途落雨而暫停，無奈變成咗馬拉松賽事。
氣象部預測下周轉晴
氣象專家表示，過往伴住奧運會左右嘅炎熱同晴朗天氣，極有可能喺今屆倫奧消失。倫奧籌委會主席高爾就苦笑咁話：「我曾經聽過一個笑話，話要為英國所有地方興建一個上蓋。」
英國博彩公司威廉希爾仲為倫奧開幕禮當日係咪落雨而開盤，將落雨嘅賠率定為2倍。
不過，倫敦氣象部門日前表示，下周中開始有望放晴。發言人話：「冷空氣即將移離倫敦，包括倫敦在內嘅英格蘭中南部地區，由下周開始會轉晴，氣溫亦有望回升。」不過，倫敦市長約翰遜就表示，英國人唔應該埋怨天氣，應該感謝大自然嘅恩賜。佢話：「我哋應該喜歡間中落雨，咁樣晴天時先至可以令人感到愉快。」
倫奧相關落雨賠率
開幕禮時落雨：2倍
男子100米決賽落雨：3倍
整日田徑賽事因天雨取消：26倍
賠率來源：珊瑚、立博、威廉希爾
