王晶早排話今屆港姐質素唔掂，惹嚟陳百祥（阿叻）同佢隔空罵戰，噚日佢兩個離奇friend番。王晶應無綫邀請做評判選港姐入決賽，噚日佢同阿叻喺尖沙嘴出席無綫《2012香港小姐競選選戰英倫》記招，佢哋仲演咗場大龍鳳。阿叻先向王晶鞠躬道歉：「佢（指王晶）係我恩師，真係天大面子請到佢嚟，我鄭重向你道歉，我口不擇言，成日講錯嘢。」
搭膊頭影相
之後阿叻同王晶搭晒膊頭影相，王晶話同阿叻幾十年朋友，冇嬲喎。阿叻繼續認衰話：「睇人心胸幾闊，好難搵番啲死老鬼，跟住我又去睇個60幾歲好有活力嘅老翁（指譚詠麟），我冇腦，個腦25歲前停止咗，係衝動派。」
噚日公佈咗九位入圍決賽佳麗，除咗之前直入決賽嘅張名雅、李渼琦同曾明俐，「翻版陳妍希」陳潔玲成為第四位入圍佳麗，加埋朱千雪、林泳淘、岑杏賢、湯洛雯同黃心穎五個佳麗齊齊入決賽，下星期會公佈埋最後一位入圍者。不過，俾人out咗又要玩復活戰嘅鍾麗同陳華鑫，最終都係復活唔到。