43歲嘅日本型男演員福山雅治多才多藝，除咗係演員歌手，亦係一位水平極高嘅攝影師。自2000年悉尼奧運起，每屆都到現場拍攝，今屆亦冇例外；福山更加關注鄉里兼日本奧運體操選手內村航平嘅表現㖭！
喺出發往倫敦之前，福山雅治接受日本傳媒訪問，大談點解咁鍾意奧運。佢話：「以前，我對運動、奧運都冇乜興趣，不過，悉尼奧運令我發現，呢個四年一度嘅體育盛事，原來有好強大嘅力量！」
近屆喜現場拍奧運
展望今屆奧運，福山就話：「最感興趣嘅自然係我家鄉長崎出身嘅運動員，男子體操『全能王』內村航平；仲有馬拉松選手藤原新都是。藤原新嘅家鄉喺諫早市，離我嫲嫲嘅屋企好近。要想登上奧運呢個大舞台，靠嘅唔只係天賦，更重要嘅係是意志、同教練嘅配合及良好嘅環境。我衷心希望長崎嘅運動員，可以喺奧運賽場多多加油！」
相信福山大可以放心，因為佢哋鄉里選手目前狀態唔錯，以內村航平為例，早前經歷咗小低潮後，家已經回起，更豪言要喺倫奧奪5金！內村為咗可以喺倫奧爭取佳績，更自備秘密兵器，日本《有樂製菓》專登為佢特製嘅3箱共90塊朱古力。呢啲朱古力全長有9厘米，熱量剛好等如一餐飯；仲有「X」嘅標識，表示係內村專用型。據講呢種特製朱古力含有可調節消化嘅物質，當內村感覺疲勞、喺訓練或者喺場上等待時，可以食一塊嚟秒殺飢餓。