尹佩斯入魔？如果喺一個月前，我求大俠真係當吹水新聞嚟聽算，但家搞搞吓，分分鐘會成事；事關祖雲達斯同曼城兩大潛在買家都未出手，而曼聯嘅貝碧托夫就好大機會走人，話唔定紅魔會簽尹佩斯嚟頂貝碧。
曼城祖記唔要
自從28歲嘅尹佩斯話唔同阿仙奴續約，佢嘅轉會傳聞反而淡靜咗落嚟。曼城之前話泰維斯同迪斯高唔會走人，加埋阿古路同巴洛迪利，真係塞唔落多個尹佩斯。祖記方面，佢哋又貪嫩口，睇中咗22歲嘅費倫天拿輔鋒祖維迪。又係嘅，大家轉會費差唔多，畀我都要個後生啲啦，而且人工仲平啲㖭！祖維迪嘅周薪大概45,000鎊（約55萬港元），比起至少過10萬鎊嘅尹佩斯，的確抵好多！
料頂貝碧空缺
即係話，剩番嘅買家就得曼聯。領隊費格遜話貝碧去留都無所謂：「上季佢冇咩上陣機會，其實以佢嘅年紀，又真係好難接受排喺朗尼、韋碧克同查維亞靴南迪斯之後。」咁被人投閒置散，睇嚟貝碧都走硬。
英國《鏡報》透露，費格遜已經向球圈好友表示，他有信心尹佩斯下季會來到奧脫福，預料轉會費為2,000萬鎊。英國莊家亦唔執輸，列出尹佩斯在今夏轉會窗關閉前，投曼聯為1.81倍；過檔曼城同祖記就分別為3.25倍同9倍。
睇番資料，上次有兵工廠球員跳槽曼聯，已經係87年嘅事；嗰陣費格遜啱啱上任紅魔領隊，首個收購就買咗阿仙奴後衞安德遜（VivAnderson）。