早排各電視台為爭播奧運搞到滿城風雨，其實睇奧運，動態畫面吸引之餘，靜態相片也同樣精采，甚至更具震撼力。兩位資深攝影師Bobby同Kin，同樣經歷過多項大型賽事及兩次奧運，由運動攝影，講到奧運種種經歷，從攝影角度看近代奧運的點點滴滴。
記者：韓繼聰
攝影：譚盈傑
轉入數碼年代 構圖更重要
Bobby於八十年代入行，絕對係近代攝影發展見證人，談到體育攝影多年來的轉變，已立刻自動波滔滔不絕。「當年嘅體育攝影，中到Focus已經叫靚相！」當年相機未有自動對焦功能，要「中焦」係長年累月的練習同經驗，加上體育項目大多不停郁動，對焦自然難上加難。後來自動對焦相機出現，對相片要求自然又有轉變。「當對焦變得輕易，體育攝影就開始要求捕捉神態及動作。」雖然對焦快咗，但其實菲林依舊有限，攝影都要心裏有數就住影，避免因無菲林而錯失拍攝良機。
及後，攝影終於進入數碼時代，Bobby亦有機會參與2000年悉尼奧運。「當年用CanonDCS520，好大部，不過體驗到數碼真係好方便！」少咗冲曬程序，速度要求當然更高，同時，拍攝成本減低，作品要求又有所轉變。「影相更方便，無論攝影師自己和讀者都對相片要求更高，除基本捕捉動態神情外，會要求更多構圖上的配合和突破，豐富相片的內容或美感。」Bobby展示在悉尼的得意之作，風格果然跟舊有的有些不同。
發掘獨特題材與角度
問到影運動相片嘅貼士，Bobby就話一般業餘影友未必需要追求太專業裝備同鏡頭（畢竟太貴），反而應該多發掘獨特題材。例如你支鏡唔夠長，睇波時影球員未必清楚，你大可以影下球迷反應，其實同樣精采。「唔好被傳統攝影角度規限，嘗試多角度唔同拍法，找尋同該運動項目動作相關的背景等，都能拍出較特別和具風格的作品。」
要了解運動規則
同Bobby勁老友嘅Kin，講到另一個運動攝影的重點，就係要了解唔同嘅比賽規則。佢以中國勁攞金牌嘅奧運項目舉重做例子：「好簡單，舉重有多次試舉，但其實只要其中一次成功舉到最重已經贏。如果你唔了解，以為最後一舉先計輸贏，咁咪出事囉。」Bobby插嘴：「悉尼奧運真係好貼心，有專人喺賽前講解規則，講埋最好嘅攝影位，好Friendly！」講到悉尼奧運，Kin即時勁插雅典奧運。「當年雅典安排真係超唔掂，成個城市Internet又慢又唔穩定，有啲場館直頭連網都無得上！」
考攝記體力耐力
Bobby同Kin各自參與過兩次奧運，講到難忘經歷，佢哋不約而同講：「曬！」奧運項目好多喺室外，周不時要由朝曬到晚。Kin話：「當年喺雅典我要影划艇，有好多唔同組別，我由初賽一直影，曬足咁多日！」體力耐力真係可以媲美運動員。
《運動攝影四寶》
1.揀相機最緊要快
揀相機，兩位攝影師都話無特別偏好品牌，最緊要反應快、TimeLag短，方能隨心捕捉精采一刻。
CanonEOS1DX（淨機身$51,800/a）
Canon最新最強旗艦機，配1,810萬像素全片幅CMOS，雙DIGIC5+超高速影像處理器，以及61點高密度網型自動對焦感應器，可進行高達每秒12張高速連拍。
NikonD4（淨機身$52,800/b）
NikonD4備有FX格式1,620萬像素CMOS，EXPEED3影像處理器，51點自動對焦系統，連拍速度高達每秒11張，啟動時間只需0.12秒，快門時滯0.042秒。
NikonD800（淨機身$26,800/b）
論速度雖不及1DX同D4，但擁有中片幅同Level嘅誇張3,630像素CMOS，相質極細緻，加上價錢比1DX同D4平一截，係追求畫質嘅抵玩之選。
2.長焦距鏡 各有所長
大部份賽事都跟運動員有一定距離，加上攝影師喜歡捕捉運動員表情，大光圈長鏡可謂運動攝影必備工具。
80-200mm靈活長距
一支可變焦的中長焦距鏡頭，係兩位攝影師必備基本裝備。變焦鏡頭勝在使用靈活，可減少走動。
400mm足球專用
影過世界盃嘅Kin，認為400mm是影足球「專用」焦距，「WideShot影禁區外球員啱啱好，入到禁區亦影到全身動作。」
600mm游水無走雞
影運動員表情同特寫，Bobby話600mm焦距啱啱好影到一個標準直池對面，唔少游泳健將勝利高呼一刻，都係靠600mm鏡頭影出嚟。
3.單腳更靈活
有長鏡又點少得腳架？為求靈活大多揀選單腳式，而且最緊要輕身兼夠硬淨，碳纖就最正，若可快速打開同收合就更佳。
4.一人控多機
一個專業體育攝影師，好多時需同時控制多部相機。務求同一時間拍出更多角度及選手，一個人走唔晒咁多位置，遙控器就係一個好幫手。
查詢：
（a）Canon（31912333）
（b）Nikon（29071122）
真經典：70年代中焦水怪
每年都有大把運動攝影作品見街，但邊張先叫得做經典？Bobby想了想：「其實好多都靚，不過心目中經典，必定係1972年8月《LIFEMagazine》水怪史畢茲封面！」話說當年還是手動對焦年代，如此高速的長焦距CloseUp，「中焦」難度已極高，加上清楚捕捉史畢茲肉緊表情，可謂攝影技術與觸覺的完美結合。
行規：未掂波唔好影
去Ball跳舞、食嘢都講究禮儀，但原來運動攝影同樣講究「禮儀」。就算高爾夫球同桌球都不屬奧運項目，但亦算熱門運動，發燒友現場拍攝時，謹記球員一日未打到個波，你都千萬唔好㩒掣影相。事關呢啲較靜態嘅運動，非常考運動員集中力，一下快門聲隨時影響佢哋表現。
