近幾個星期傳到㷫烚烚嘅轉會傳聞終於落實，AC米蘭嘅伊巴謙莫域同巴黎聖日耳門（PSG）傾掂數，簽約3年，年薪達1,300萬歐元，係世界第2高薪嘅球員；而佢今次嘅轉會費係2,000萬歐元（約1.9億港元），職業生涯累積轉會費有成1.62億歐元咁多，冠絕全球。
累積轉會費達15.4億
PSG足球總監李安納度喺周二公佈呢個消息：「雙方已經達成協議，交易落實。伊巴已經係PSG嘅球員，我相信佢可以為球隊寫下歷史嘅新一頁。」伊巴嘅經理人都話：「談判各方都好滿意，當然包括伊巴。」伊巴已經飛抵巴黎，喺周三朝早進行體測，下晝就參加PSG嘅記者會，正式宣佈加盟。
據報，呢位30歲嘅瑞典前鋒以2,000萬歐元嘅轉會費由AC米蘭來投，係佢職業生涯至今第6度轉會，累積轉會費一共為1.42億歐元，排喺全球首位，勁過1.28億歐元嘅安歷卡同1.09億歐元嘅C朗。值得一提嘅係，伊巴由國米轉會巴塞嗰陣，除咗值4,600萬歐元轉會費，仲加多個伊度奧；若計埋後者約2,000萬歐元身價，伊巴嘅累積轉會費更加高達1.62億歐元（約15.4億港元）。
年薪更勝美斯C朗
除咗身價，伊巴份人工都唔少嘢。佢同PSG簽約3年，年薪達1,300萬歐元，係現今第2高人工嘅球員，僅次於安治嘅伊度奧；後者家1年𢭃緊2,000萬歐元。當今兩大球王美斯同C朗嘅年薪都分別只係1,050萬歐元同1,200萬歐元咋。
自卡塔爾財團喺舊年夏天入主PSG後，就足足用咗成2億去買人，當中大半隊正選都係由意甲買番嚟，搞到成個意甲好似變咗PSG嘅衞星球會咁；我求大俠同大家數下，伊巴、堤亞高施華、拿維斯、文尼斯、柏斯托尼、莫達、施素高同埋門將沙華托尼施利古，至少有成8個咁多，厲害！
轉會費為港元
1歐元兌9.49港元
資料來源：法國《隊報》