【本報訊】大市交投慘淡，經紀無啖好食，大呻生意少逾半。港股今年日均成交559億元的6年低，以中小型華資行為主的C組證券行市佔率越縮越小，有經紀指苦況為歷年罕見，很多要搵「秘撈」幫補，有人揸的士，有人搞網購，打滾多年的老行尊更勸勉年輕人轉行，「再落去係浪費光陰、蹉跎歲月」。
記者：林靜
據港交所（388）最新市場佔有率報告顯示，C組經紀行上月佔有率維持9.09%，續在3年半的低位徘徊，不過港股每日平均成交額僅錄460億元，按月減17%，創逾三年或40個月低，慘況僅次金融海嘯。本月至今的日均成交額跌至429億元。
細行月入廿萬難「維皮」
在「餅」越來越細的情況下，小型經紀生意實際已進一步轉差，假設C組約450間經紀行，並以佣金為0.1%計，平均每間行一個月佣金收入不足20萬，扣除租金人工等燈油火蠟，要「維皮」難度極高。
細行難撈，大行壟斷市場局面卻穩固。A組經紀行（成交市值排名第1至14名，多屬外資大行）市佔率58.28%，連續四個月高企在58%或以上；B組（排名15至65名）經紀行則佔32.63%。
交投氣氛淡靜，過往證券行電話響不斷、討論聲充斥的熱鬧情況不再。本報昨日在中環一間證券行觀察，發現並非所有經紀均上班，部份人只在看報紙、甚至小睡，場面冷清。有經紀承認，近日生意少兩至三成，另一人更直呼「無咗一半有多」，他們認為除了市況及低佣競爭，網上交投近年漸成趨勢，亦拖低生意，「用電腦同用電話，速度都爭幾秒」。大部份經紀均表示，目前唯一可做的是等待市況回暖，「無可能成年都旺，惟有好天搵埋落雨柴」。
老行尊：趁後生快轉行
入行40幾年的陳先生則較悲觀，直指「做經紀咁多年未見過個市況咁差，就算股災嗰時一樣有生意，家一日得五、六個電話……以前要用三個電話，仲唔敢行開，7點先有得放工，最高峯試過接120個電話。」他認為行業前景未看到希望，「我老啦，就話精神寄託，返嚟過日辰，後生嗰班呢，就最好轉行啦……歲月無情呀，老咗去應徵都無人請啦。」
不過，有經紀仍然未言棄，05年入行的呂先生指轉機一直都存在，「好似我哋之前都借iBond嘅機會拉客，聽到有經紀一個人搵到百幾個客，都成萬蚊落袋。」他又引用股神畢菲特名句指，「潮退就知邊個裸泳啦。」惟另一經紀林小姐表示，雖然有藉iBond機會重新聯繫一些舊客，但市況弱勢，要他們重新投入股市並非易事。
很多香港股民選擇離場避戰，內地股民更索性取消戶口無眼睇。根據中國證券登記結算公司最新資料顯示，內地每日平均有1500名股民取消股票賬戶的個案，當中大部份為年輕人，凸顯連內地股民都心灰意冷程度有多嚴重。
