上星期日講「淪陷上海」，提及外籍人士在上海患病入院，醫療費用高昂，中貿W來電提供資料，佢仍有疏堂叔公（九十幾歲）在鄉下，佢每次回鄉，就會探訪親戚，覺得疏堂叔公嘅身體幾好，點知上星期突然接到親戚電話，知道叔公中風，送入醫院，每日住院費一千元人民幣，如果做手術，價錢付不起，問中貿W可否支援醫藥費，中貿W一口應承。次日，親戚再來電話，還要考慮到手術紅包費，叔公已九十幾歲，恐怕動手術不宜，已經將老人家帶回家，以免再付留院費每晚一千元，佢地驚住如果唔快啲走，叔公會俾醫院強行收留，形同人質，以後慢慢計數，農民家庭根本無力支付條數。中貿W嘆幾聲：「叔公一家只是農民，邊度有錢俾，中國嘅醫療制度有重大缺陷，香港私立醫院打開大門嘅話，內地有錢人一定係嚟香港就醫、生仔。」
都話咯，醫療制度最能凸顯貧富懸殊，香港梁振英政府出閘幾乎墮馬，想收復失地（民望），不妨從宣佈增建醫院、輸入海外醫生開始。唔係冇錢嘅啫，若果用千幾億元嚟私有化港鐵與回購領匯而唔去搞好醫療，中產階級應上街示威抗議，請CY下台！
寫到呢度，收到校友傳真通知教育界資深人士，新亞資深校友李金鐘嘅太太李何芷阡博士於七月九日逝世，享年七十三歲。何博士係港大榮譽理學士，加拿大麥馬士特大學博士，曾在浸會書院物理系教書，惡佬明就上過佢嘅堂，又做過嶺南書院教務長、新界崇德社創社社員、香港女青年會理事，向中大捐獎學金及其父親何柏先生珍藏之清代瓷器。何博士今驟然辭世，聞者惜之。李金鐘為太太於七月二十九日設靈於香港殯儀館，七月三十日星期一上午出殯，請李何芷阡博士之生前親友、校友、學生注意及之。上世紀五十年代，甚少女生讀港大，讀物理學嘅更少，李太屬於香港女科學家之先鋒，啟動新風氣。佢生前經常同李金鐘出席大小中文大學校友活動，好多人以為佢係中大畢業生，唔知佢係港大讀書叻女！