「港人港地」之說，係梁振英競選之時提過出嚟嘅，地產界人士反應不佳，市場派（例如左丁山）期期以為不可，因「港人港地」違反香港之市場對外開放原則，不合乎香港之資本自由進出傳統，雖然澳洲有「澳人澳地」，新加坡有「新人新地」，以遏止外資流入炒貴地產，但香港素來不行這一套，梁振英在競選後期已經修訂為「樓市熾熱時，方考慮港人港地」，家佢得咗嘞，住入禮賓府，新政府對「港人港地」之說陸續降溫，正合左丁山心意！最好講到明明白白，以後五年不推行港人港地政策，唔好遲啲又轉卦變口風。
新政府接下前朝火棒，孫明揚拍板，下學期在小學推行嘅，就係國民教育。教育局局長吳克儉新上任，表示會如期實施，不會延遲，惹來不少叫駡之聲，孫局長好彩走得快，好世界。其實德育與國民教育這回事，全世界都有，非獨香港為然，要害不在乎學校嘅教科書，教材好多時都係愛國八股嘅啦，而在乎整個社會嘅自由開放程度，特別係新聞自由，言論自由。有呢兩大自由得到保障嘅話，理得愛國學校教學生怎麼樣八股愛國，學生離開學校，聽到社會咁多不同聲音與媒體咁多樣化評論，邊度會俾學校洗腦吖。洗腦只能在一個封閉社會進行、在一個禁止新聞自由嘅國家地區進行（例如北韓），不會在香港得到實踐。但我地必須小心謹慎，不要俾人呃吓呃吓就逐漸失去自由，例如港人港地政策就係限制投資自由嘅政策，用「港人港地」嚟呃你可以抑制樓價，遲啲又可以限制外人來港購物、外人來港生仔女、外人來港工作，不經不覺之中，逐漸限制我地市民自由及市場自由，到習以為常之時，又可以鼓動羣眾禁制、批鬥少數愛講不同意見嘅人士，到時甚麼德育與國民教育教科書都可以唔駛要咯。
左丁山不反對國民教育，但反對教育局磅水俾一啲機構研製教科書，應該立即停止津貼資助任何人，應該容許各教科書商，各界出版商自由出版德育與國民教育教科書與教材，等學校有得揀。政府津貼教聯機構會限制競爭自由，點解唔反對？