緣份令人和人遇上，亦令小動物遇上願意照顧牠們一生一世的好主人。文詠珊（JaniceMan）當年路過寵物店，跟籠中身小耳大十足小魔怪的蝴蝶犬「BB」一見鍾情。接着這六年內，JM和愛犬BB經常形影不離，經歷生死關頭，更為小魔怪呷醋流淚，觸動無數的真情。撰文：麥佩儀
文詠珊和BB的故事就是如此開始，某年的一個晚上，她和好友行經寵物店，剛巧看到出世剛剛兩個月左右的蝴蝶犬BB，她憶述：「當時第一眼見到佢，覺得佢好得意，因為佢個身好細，十足個波咁，但係兩隻耳仔離奇地咁大，十足小魔怪，好cute。」
悉心照料保命
不過當時JM沒有因和BB一見鍾情而即時買走牠，只是和朋友食飯，但卻奇怪地整餐飯她都想着BB，結果食完飯已急不及待再到寵物店，決心帶BB回家。
但JM帶了BB回家未夠一星期，已發病不停咳，命懸一線，JM說：「因為嗰時佢啱啱出世，身體好弱，所以我好緊張即刻帶佢去睇急症，當時個醫生話佢可能係發狗瘟，叫我有心理準備。我一聽到已經喊，跟住個醫生仲話，啱啱買返嚟，不如去寵物店換另一隻狗，我聽到啲眼淚即刻標晒出嚟，我死都唔肯，因為我覺得呢個係緣份，我既然咁掛住佢，買佢返嚟，點可能隨便搵另一隻去取代。」
JM表示當時自己只懂不停叫醫生無論如何盡力搶救，她透露當時適逢夏天，又熱又焗，但為免開冷氣冷親BB，不但不敢開太大，更要不時為牠蓋被及餵食藥，幸好經JM眠乾睡濕悉心照顧後，BB總算執番條命仔。
雖然JM形容BB因身小耳大十足小魔怪，但牠的性格卻狗如其名十足BB，JM笑稱：「BB係唔可以孤獨，佢好鍾意同人玩，好黐人同好嗲，又依賴，佢仲好似聽得明人講嘢，遇到唔開心同佢傾偈，佢識得錫番你，好sweet㗎。」
識冧主人抵讚
不過現在JM工作忙碌，加上又搬了出去獨居，因此少了時間陪BB，照顧牠的責任就交由JM媽咪負責，結果JM苦笑說：「家BB好聽同好黐我媽咪，有時返到屋企見佢咁嗲媽咪，完全聽晒我媽咪嘅命令，黐到實一實，我抱走佢都即刻跑番去媽咪身邊，見到真係都有啲唔開心。」難怪有時JM媽咪出街，BB也會鬱鬱不歡，呆坐在門口等JM媽咪回家。
BB可以令JM呷媽咪醋，皆因牠識冧主人又聽教聽話，只要叫BB錫錫，牠便識做地狂錫，又懂請請和唔准郁等動作和指令，難怪令JM為牠爭風呷醋。
狗明星客串《大追捕》
原來不但JaniceMan是藝人，查實BB也是狗明星，牠除了跟主人一同演出電影《大追捕》外，之前都在JM很多模特兒工作中客串演出上過鏡，BB亦和JM接受過雜誌專欄的訪問，上鏡演出當然noproblem。
JM表示：「當日BB之所以會客串《大追捕》，係因為咁啱我戲中角色比較內向，唔會同其他人講嘢，只係同小動物傾偈，導演知道我有隻狗，咪叫我帶埋佢去拍戲，話晒自己養開，出嚟感覺更加真實。」JM坦言如果日後有適合角色，絕不介意BB演出。
