【綜合英國外電】參加倫奧網球女單嘅俄羅斯美女舒拉寶娃，周二話唔會入住選手村，主要原因係位於奧林匹克公園內嘅選手村，距離舉辦網球嘅溫布頓太遠，所以佢會住係溫布頓場館附近。其實舒娃喺08年京奧嗰時已經以選手村太嘈為由，而拒絕住喺選手村。
短髮look做索模
最近一本俄國時裝雜誌，刊登咗呢位將會喺開幕禮，擔任俄羅斯持旗手嘅靚女時裝相。呢輯相只可以兩個字嚟形容：索爆！雖然佢冇着啲好性感嘅衫，但係就將佢嘅女人味完全帶晒出嚟。舒娃早前喺facebook上載一啲令一眾男球迷發晒狂嘅自拍短髮相，同今次幾個造型好相似，有可能舒娃當時就係幫緊呢本雜誌拍嘢。
呢一輯相帶出咗舒娃成熟味道，不過大家唔好唔記得佢雖然只有25歲；原來唔經唔覺，都出道咗11年啦。