奧運會冇美女？No啦！今屆倫奧，靚女運動員就數之不盡，單計中國軍團就至少有10位；至於外國亦不遑多讓，泳手懷絲同網球手伊娃諾域等，就係好例子。各位男士，毋須花錢買模寫真，只要開電視睇奧運，眼睛一樣有得食冰淇淋。
澳洲靚女多，代表人物有名模MirandaKerr同影星妮歌潔曼；而喺袋鼠國嘅體壇當中，美女亦多的是，首推當然係泳手懷絲（StephanieRice）。呢名24歲選手五官標緻，笑容更相當甜美，所以迷倒不少男「粉絲」；更重要嘅係，佢並非泳壇花瓶，本身實力強勁，仲喺4年前北京奧運勇奪女子200米、400米個人四式，同埋4x200米自由泳接力3面金牌。喺今屆倫奧，呢名生於布里斯班嘅選手將會出戰兩項個人四式；睇吓佢到時會唔會燒着游池。
伊仙芭耶娃文武雙全
除咗懷絲，俄羅斯嘅伊仙芭耶娃都係「睇得又打得」嘅倫奧運動員。呢名30歲撐竿跳選手先後喺04年雅典奧運同08年北京奧運贏得金牌，而且有碩士學位，目前更喺烏克蘭一間大學進修；所以，名副其實係美貌與智慧並重嘅運動員。
另外，31歲嘅英國單車手彭度頓亦不時成為男性雜誌嘅封面人物，足證外界都認同佢係體壇靚女；至於塞爾維亞網球手伊娃諾域、意大利排球選手比絲妮妮亦係靚女級運動員，其中拍過全裸照嘅比絲妮妮更被認為係排球壇第一性感女神。
綜合英國外電
