書展周三開鑼，刻意找找有關足球的書籍，結果如往年一樣，找到的多是英文書，如史高斯自傳。「波牛邊睇字㗎？」可能大家都這樣想，故此香港的足球書籍從來不多。2000年《奪標》停刊後，很多人驚嘆「香港連一本體育雜誌也容不下？」那時普遍人認為，香港人都不愛做運動；做運動的亦不愛睇字。
但近年情況好像有改變，體育雜誌《運動版圖》面世，足球雜誌亦再度蓬勃，連集中講本地波的《KeymanSoho》也有，反常現象怎解釋？其實版版「字海」的《足球周刊》長期受捧，已證明原來波牛唔係唔睇字。
體育雜誌要夠專
當然，香港雜誌資源絕不能像國內的《足球周刊》，在歐洲各地也派駐記者。但只要與時代配合，一樣有機。現在隨便網上一click便資訊爆炸，只報道世界體壇資訊已不合事宜，本地化的《運動版圖》和《KeymanSoho》，內容網上找不到，反而有市場。而正因資訊爆炸，讀者要求亦更專門，一本雜誌各項體育樣樣講已行不通，愛足球的未必睇籃球；跑馬拉松的又未必打保齡。足球、高球、NBA各專項分家，才有路走。
個人願望，當然是本地體育書刊能長做長有。順帶在此賣賣廣告，小弟新書《歐洲睇波GOGOGOAL!》已於書展面世，內容講及小弟入行以來採訪西班牙、英格蘭等多地球會的趣聞軼事，以及到歐洲睇波自由行貼士，希望香港球迷除了睇波，間中也會睇吓字啦！
方柏翹
now足球評述員