今年爆鑊的上市公司何其多，要炒上就不如造淡，導致只要有少少流言蜚語，無乜成交下公司好容易就被人突襲。分析員朋友都同海迪講，最近已經無人講基本因素，全都係newsflowdriven，有人唱衰咁咪跌囉。想股價硬淨啲？除咗做好啲盤生意咁ABC嘅道理之外，搞好啲企業管治同危機管理真係越來越重要。一句到尾，少啲自殘囉！
近期自殘的經典例子當然係思捷環球（330）莫屬，CEO走人可以唔即刻向投資者交代，主席辭職再隔幾個鐘先出通告，仲要過咗一日，千呼萬喚之下先開電話會議，然後解釋唔即刻見人的原因，係因為「大家都travel緊」？海迪有朋友聽到想掟電話！
聽講早年已經有唔少國際級的公關公司，主動接觸思捷，想幫成日自殘的佢地拆吓彈，但都被思捷婉拒。但據講呢舖CEO走人搞到一鑊泡，副主席鄭明訓終睇唔過眼，介紹咗間公關畀思捷喇，反映思捷幾咁desperate。海迪相信思捷未來一年仲有N咁多危機會出現，首選是新CEO，將是公司最大潛在風險。市場已有古怪的傳聞走咗出嚟，希望思捷醒醒定定，唔好再激到股東媽媽聲。
海迪