如果，玻璃並非只是用完即棄的器皿，地球就有救。政府牽頭推動玻璃回收業，一貫其虎頭蛇尾的作風，靠民間團體執爛攤子。《蘋果》最近走訪兩個撐住全港玻璃回收業的團體，看到兩位有心人——80後大學畢業生Martin和輕度智障的阿宝，瞓身為業界打氣。
記者：陳詩雅
香港泥頭車司機協會
玻璃再生璀璨項目
該會原為泥運司機的職工會，每天出入堆填區看見一車又一車的玻璃被白白浪費，認為要為社會「做啲嘢」，成功申請政府「環境及自然保育基金」資助開展玻璃回收業。項目統籌April嘆道，整個項目僅兩名全職員工，其他都是義工或兼職，「收集時間太早，玻璃又重，日曬雨淋，體力勞動嚇怕有心人」。
記者到灣仔盧押道垃圾收集站訪問April，看着她聯同首天試工的Martin和義工埋首「摷」垃圾，從中揀出玻璃樽，惟陣陣垃圾惡臭撲鼻，真不好受！
「有啲酒吧分好一袋袋酒樽畀我哋，幫咗唔少忙，但合作咁做嘅唔多」。
一開工就對住垃圾山，難得Martin沒打退堂鼓，反而越摷越起勁，熱誠可嘉。他剛於香港理工大學畢業，讀社會政策，盼學以致用，「好多環保行業都係政府開咗個頭，之後拋畀民間搞，玻璃回收業可開拓更多就業機會」。April對於年輕人入行十分感動，惟政府撥款少，此路不易走。
April說，該會逢周四、六上午9至11時在灣仔收集玻璃後，運往玻璃再造廠循環再造，市民也可親自把回收玻璃交到油麻地活化廳。她認為政府未全力協助，「路政署招標可以優先畀用環保玻璃沙磚鋪路嘅公司；房署單位間房亦可試用玻璃沙磚。市場擴大咗，自然有路行」。現時本地有兩間分別在龍鼓灘和清水灣的廢玻璃再造磚廠。該會曾向路政署提交玻璃磚鋪路建議書，惟音訊全無。她指每年平均有300噸玻璃廢物沒被回收，目標是「收得幾多得幾多」。
粉嶺匡智會
玻璃樽回收行動
該會前年4月獲香港賽馬會慈善信託基金捐助、環保署為顧問，加入玻璃回收行業，主要收集尖沙嘴棉登徑酒吧區的酒樽，再造環保地磚。除環保外，更可協助智障人士就業及投入社會。
患輕度智障的阿宝（26歲）曾做酒店清潔，受過餐飲訓練，獲匡智會粉嶺綜合復康中心院長嚴主任推薦投身玻璃回收行業。回收行動項目主任莊姑娘笑指阿宝表現出色，「升佢做隊長，同我哋其他同事冇分別」。
性格怕醜的阿宝開心說，回收工作為他帶來自信，「最初工作時，熱到唞唔到氣，見到陌生人唔想出聲」。其後他定期到屋邨和屋苑的回收箱收集玻璃樽，「見得多有啲街坊都認得我，仲話：『你又嚟收玻璃喇！』」
嚴主任指當初沾手玻璃回收業，困難重重，「清潔、物流效益、學員安全、能力配合，都喺跌跌碰碰下學識」，並由最初三個試點，發展到全港127個回收點。「家私人屋苑嘅反應最好，可能同住戶環保意識較強有關」。匡智會另一位項目主任梁姑娘認為，智障學員能提升技能外，更學識溝通技巧，「體力勞動嘅技能，你同我都做到，但重要係佢哋學到人際溝通，到處宣傳見人越多，對佢哋面對群眾嘅信心好有幫助」。
新回收箱設計減工傷
環保署和房委會前年攜手在東九龍推行屋邨玻璃樽回收試點計劃，成效理想。環保署指，擺放在各屋邨的玻璃樽回收箱與普通的回收箱有分別，箱內裝有滑輪，箱底滑輪軌道下則設吸震膠，加強其吸震及隔音功能，減低玻璃樽放入箱內時產生的撞擊力和發出的聲響，免對居民造成滋擾。回收箱的前置式開口設計亦減少收集玻璃樽時的提舉工序，保障清潔工人的職業安全與健康。
社會服務
◆匿名投訴恕不處理。一經投訴，本報保留刊登權利
◆報料熱線：29290000
◆社會服務熱線：29908288
◆蘋果日報慈善基金：29908688
◆電郵：mailto:[email protected]
◆傳真：37112468
◆網址： http://charity.appledaily.com.hk