「四叔」醒條發達貼士畀大家：借孖展買地產股！恒地（012）主席李兆基昨出席傳媒午餐會時，再次「亞洲股神」上身，向記者大派投資錦囊，更揚言「真係可以發達，呢條橋無走雞！」
薦地產股 1000萬變4000萬
他指現時買股好過買樓，而他亦「買自己股份買咗好多次」；以股代息時，他都寧願收取股票。他指會繼續買地產股，「隻隻都抵買！」
所謂高風險、高回報，四叔今次「吹雞」叫投資者借孖展買地產股，講明好彩的話，「1000萬可以變4000萬！」他詳細分析：「（假設）資產100蚊，拆散佢都賣到100蚊，但放喺股票市場只賣得40蚊，少咗一大截，將來正常返，100蚊（資產）去番80蚊，都有一個開……借孖展、按揭，可賺多一個開，1000萬變4000萬。」
上月5日，四叔曾表示「家個市好危險」，但又力薦地產股，認為股價與資產值折讓大，將來會「升好多」，仲建議朋友買地產股不買樓，認為「1000萬只可以買到普通樓，而普通樓將來嘅供應將會增加，升幅有限，1000萬最多咪升到千幾萬。」
一個多月後，四叔好自豪咁話：「上次我講到家，地產股都起（升）咗10幾個巴仙，將來去到20%至30%，造按揭及孖展都唔使驚，五成按揭變咗三成，唔使驚跌價時人哋叫你補倉，用1000萬賺4000萬唔係好艱難。」翻查資料，上月四叔發表買地產股論後，本地地產股平均漲逾一成，最標青為新世界發展（017），飆升24%，恒地亦累升17%。
借錢炒股一向是投資大忌，四叔今次豈非叫投資者「鋌而走險」？他坦言：「風險係有，但你夠膽的話真係可以發達，呢條橋無走雞……賭一賭，歐洲冇乜大變動，有好大希望，賭得過。只怕歐洲有大崩圍，大家估唔到嘅意外，有少少風險。若果你睇中就好犀利，到時一變四。」
散戶應否即刻飛身入市？四叔又突然「縮沙」話：「唔敢講家係咪時候，睇你運氣，你睇得通就唔怕，家（地產股）係最平。」