【本報訊】富豪李澤楷及歌星陳奕迅曾光顧的日式爐端燒食店南亭，其銅鑼灣分店發生「離奇」襲擊案。一名聲稱熟客的男顧客，前晚晚飯後埋單1,200元時要求九折優惠，卻被職員拒絕，顧客不忿多付百多元報警求助，其間聲稱遭男職員掟結帳簿擊中大腿，警員最後拘捕涉襲擊的男職員，顧客則送院檢查。
記者︰李家傑
現場為銅鑼灣新會道6號京城大廈地下南亭。南亭為日式爐端燒店，有三間分店，分別在中環、銅鑼灣及跑馬地，李澤楷及陳奕迅多光顧跑馬地分店。據該店一名經理表示，客人光顧後可申請會員卡，下次光顧出示會員卡便獲九折優惠。
未有出示會員卡
前晚姓陳（39歲）男子偕姓羅(31歲)女友，到銅鑼灣的南亭晚膳後，賬單為1,200元，陳聲稱是「VIP」貴賓會員，要求九折優惠，但未有出示會員卡。食店姓陳（35歲）男職員拒絕給他優惠。「佢話今日呢度我話事，我唔會畀你九折。」兩人發生爭執，顧客報警求助，警員到場調停期間，事主報稱有人發爛渣，「算啦，打九折畀你，然後佢將本結賬簿掟落我隻腳度！」事主報稱左大腿被擊中受傷。「我一個月嚟好多次，之前嚟開都有呢個（九折）安排，熟客仔食正價嘢都有優惠。」
惟現場有人反駁：「佢一年嚟兩、三次，算唔算成日嚟，算唔算係熟客？佢正價時段嚟淨坐唔叫嘢，坐到特價時段先叫嘢食，佢好多麻煩嘢㗎，明明我哋食店冇呢樣嘢食，就要我哋員工出去買畀佢食。」有人對事件表示無奈，透露打開門做生意無法避免各類型顧客，涉事職員則堅稱無打顧客，惟職員涉襲擊被捕。
