港鐵（066）同新政府一樣都鍾意開新位，噚日公佈加咗個副行政總裁，由財務及業務拓展總監梁國權（Lincoln）升任，任期三年，財務總監就遲啲請番。
呢個新位認真多嘢做。據港鐵份通告講，Lincoln將會帶領落實公司喺中國同海外嘅拓展策略，發展香港以外市場，新職務仲包括喺呢啲市場推廣「鐵路加物業綜合發展」模式。
咁都唔只，佢仲會領導一個新設嘅執行委員會，負責審批新投資項目；又要負責同特區政府磋商香港未來鐵路項目；當行政總裁韋達誠公幹離港或休假，佢要替任老闆職務。
照咁講，搵生意、批新投資、同政府講數都係佢，華華即刻有一個疑問，佢老闆韋達誠做乜呢？唔通係睇住Lincoln做嘢、睇住喺香港進行緊嘅項目、還是畀三年時間Lincoln實習做行政總裁？